Aqmola oblysynda 32 adam «gonkong tumaýyn» juqtyrǵan

KÓKShETAÝ. KAZINFORM – Aqmola oblysy boıynsha «gonkong tumaýy» eń kóp Kókshetaý qalasynda tirkelgen.

Aqmola oblysynyń bas memlekettik sanıtarııalyq dárigeri Serik Omarhanovtyń málimetinshe, epıdemıologııalyq maýsym bastalǵaly óńirde jiti respıratorlyq vırýstyq ınfektsııanyń 42 750 jaǵdaıy tirkelgen. Ótken jyldyń sáıkes kezeńimen salystyrǵanda naýqastar sany ósken. 2024 jyly 42 006 jaǵdaı anyqtaldy. Naýqastardyń 28 733-i (67%) – 14 jasqa deıingi balalar.

— Epıdemııalyq maýsym bastalǵaly A (H3N2) tıpti nemese Qazaqstanda 2001 jyldan beri anyqtalyp kele jatqan «gonkong» tumaýynyń 32 zerthanalyq rastalǵan jaǵdaıy tirkeldi. Kókshetaý qalasynda – 17, Arshaly aýdanynda – 13, Atbasar aýdanynda jáne Stepnogorsk qalasynda – bir-bir jaǵdaıdan anyqtaldy. Onyń ishinde 8 jaǵdaı 14 jasqa deıingi balalar arasynda tirkelip, ol jalpy naýqastardyń 25 paıyzyn qurady, — dedi Serik Omarhanov.

Sondaı-aq COVID-19-ǵa júrgizilgen 980 zertteý úlgisiniń eshqaısysynan oń nátıje shyqpaǵan.

Óńirde A (H1N1), A (H3N2) jáne V tıpti tumaýǵa qarsy 83 162 adam egilgen.

— BMSK deńgeıinde medıtsınalyq kómek kórsetý úshin 156 mobıldi brıgada, 34 súzgi-kabınet, onyń ishinde júkti áıelder men balalarǵa arnalǵan 12 kabınet jumys isteıdi. Jedel medıtsınalyq járdem kórsetýge 76 brıgada jumyldyrylǵan, — dep atap ótti oblystyń bas sanıtarııalyq dárigeri.

Infektsııalyq statsıonarlarda jáne mamandandyrylǵan aýrýhanalardyń ınfektsııalyq bólimshelerinde 191 tósek-oryn daıyndalǵan, qosymsha 133 rezervtik tósek bekitilgen: 107-si – eresekterge, 26-sy – balalarǵa arnalǵan.

2025 jyldyń 25 qarashasyndaǵy jaǵdaı boıynsha 100 patsıent, onyń ishinde 28 bala aýrýhanaǵa jatqyzylǵan. Tósek-oryn júktemesi 52 paıyzdy quraıdy. Reanımatsııalyq oryndar ázirge bos.

Osyǵan deıin ShQO-da 50-ge jýyq adam gonkong tumaýyn juqtyrǵany týraly jazdyq.