Aqmola oblysynda 300 mlrd teńgege astyqty tereń óńdeý zaýyty salynady
ASTANA. KAZINFORM – Qazaqstan Úkimeti Aqmola oblysynda astyqty tereń óńdeý zaýytyn salý jobasy boıynsha ınvestıtsııalar týraly kelisimdi maquldady.
Memleket basshysy Qasym-Jomart Toqaevtyń agroónerkásip keshenin damytý jónindegi tapsyrmalaryn iske asyrý aıasynda QR Aýyl sharýashylyǵy mınıstrligi men «Azııa Altyn Dán» JShS arasynda kelisimge qol qoıýǵa ruqsat berildi. Tıisti qaýlyǵa Premer-mınıstr Oljas Bektenov qol qoıdy.
Joǵary tehnologııalyq kásiporyn Aqmola ındýstrııalyq aımaǵynda 500 gektar aýmaqta boı kóteredi. Joba agroónerkásip keshenindegi óńdeý sektoryndaǵy iri óndiristerdiń birine aınalmaq. Onyń basty ereksheligi – astyqty bıotehnologııalyq tásilmen, qaldyqsyz tereń óńdeý.
Jobanyń jalpy ınvestıtsııa kólemi 300 mlrd teńgeni quraıdy. Kásiporynnyń jyldyq óndiristik qýaty 6 mln tonnaǵa deıin jetedi.
- Kásiporyn tolyq tsıkl boıynsha jumys istep, joǵary qosylǵan quny bar ónimder shyǵarýǵa baǵyttalady. ıAǵnı un jáne jarma ónimderinen bastap, aýyl sharýashylyǵy janýarlaryna arnalǵan daıyn jemge deıin óndiriledi. Bul eksport qurylymyn ártaraptandyrýǵa, ishki shıkizatty tıimdi paıdalanýǵa jáne ımportqa táýeldilikti tómendetýge múmkindik beredi.
Joba óńirdiń áleýmettik-ekonomıkalyq damýyna da yqpal etedi. Kásiporynda shamamen 800 jańa jumys orny ashylady. Sonymen qatar ınvestor jyl saıyn 40-qa deıin bilikti tehnıkalyq jáne bıoınjenerlik mamandar daıarlaýdy óz mindetine alady. Bul jumys úzdiksiz bilim berý júıesi arqyly, sonyń ishinde sheteldik taǵylymdamalar men halyqaralyq almasý baǵdarlamalaryn qamtı otyryp júzege asyrylady, - delingen aqparatta.
Zaýyt bazasynda ǵylymı-zertteý jáne tehnologııalyq zerthana qurý josparlanǵan. Budan bólek, ınvestor ındýstrııalyq aımaqtyń ınjenerlik-kommýnıkatsııalyq ınfraqurylymyn damytýǵa qosymsha qarjy bóledi.
Kásiporyn iske qosylǵannan keıin Astana – Qaraǵandy avtomagıstralinde jolaıyryq salý, sondaı-aq ındýstrııalyq aımaqqa aparatyn jańa avtojol men temirjol ınfraqurylymyn damytý kózdelgen.
Investor óńirdiń áleýmettik ınfraqurylymyn qoldaýǵa da qatysady. Joba tolyq iske qosylǵannan keıin bilim berý, mádenıet, sport, jastar saıasaty jáne densaýlyq saqtaý salalaryndaǵy bastamalarǵa turaqty túrde qarjy bólinedi.
Sonymen qatar zaýyt paıdalanýǵa berilgennen keıingi eki jyl ishinde júzý basseıni men jekpe-jek zaldary bar kópfýnktsıonaldy sporttyq-saýyqtyrý keshenin salý josparlanyp otyr.
Jalpy alǵanda, joba eldiń azyq-túlik jáne ekonomıkalyq qaýipsizdigin nyǵaıtyp, óńdelgen ónimderdiń eksporttaǵy úlesin arttyrýǵa jáne Qazaqstannyń joǵary tehnologııalyq agroónerkásiptik ónim óndirýshi retindegi pozıtsııasyn kúsheıtýge yqpal etedi.
Aıta keteıik, bul joba agroónerkásip kesheninde tereń óńdeý baǵytyndaǵy iri bastamalardyń biri sanalady.
Eske salaıyq, Qazaqstanda astyqty tereń óńdeý negizinde BI-95 otyny óndirisi iske qosylǵany habarlandy.
