Aqmola oblysynda 3 jyl boıy alıment tóleýden qashyp júrgen boryshker jazalandy

KÓKShETAÝ. KAZINFORM — Zerendi aýdany prokýratýrasy kámeletke tolmaǵan balalarynyń alımentin tóleýden qashyp júrgen azamatqa qatysty qylmystyq isti tirkedi. Bul týraly Aqmola oblysy prokýratýrasynyń baspasóz qyzmeti málim etti.

— Máselen, alıment tóleýge naqty múmkindigi bar azamat «J» 3 jyl boıy óz mindettemelerin oryndamaǵan. Qaryz shamamen 3 mıllıon teńgege jetken. Alaıda, ákimshilik jaýapkershilikke tartylǵannan keıin tıisti qorytyndy jasamaı, boryshker beıresmı jumysqa ornalasý arqyly óziniń naqty tabysyn jasyra otyryp, kámeletke tolmaǵan balalardy asyraýǵa qarajat tóleýden jaltarýdy jalǵastyrdy, — dep habarlady prokýratýradan.

Sot úkimimen boryshker QK-niń 139-baby boıynsha kináli dep tanylyp, oǵan 300 saǵat qoǵamdyq jumystarǵa tartý túrindegi jaza taǵaıyndaldy.

—  Alımenttik mindetterdi oryndamaǵany úshin qylmystyq jaýapkershilik kózdelgen. Kámeletke tolmaǵandardyń quqyqtaryn qorǵaý prokýratýranyń turaqty baqylaýynda, - dep eskertti quzyrly organ.

Eske sala keteıik, buǵan deıin Ulytaý oblysynda alıment boıynsha 8 boryshkerge qatysty qylmystyq is qozǵalǵanyn jazǵan bolatynbyz.