Aqmola oblysynda 264 mektep Starlink ınternetine qosylǵan
KÓKShETAÝ. KAZINFORM – Aqmola oblysynda jyl sońyna deıin 270 mektep keń jolaqty joǵary jyldamdyqty ınternetke qosylady. Qazirdiń ózinde 264 mektepke Starlink ınterneti ornatylǵan.
Aqmola oblysy bilim basqarmasynyń málimetinshe, búgingi tańda Qazaqstan Respýblıkasynyń Oqý-aǵartý mınıstrligi men Qazaqstan Respýblıkasynyń Tsıfrlyq damý, ınnovatsııalar jáne aeroǵarysh ónerkásibi mınıstrliginiń birlesken buıryǵyna sáıkes oblystyń 528 mektebi joǵary jyldamdyqty ınternetke qol jetkize alady. Onyń ishinde 264 mektepte ınternet jyldamdyǵyn 150-den 230 Mbıt/sek deıin qamtamasyz etetin Starlink spýtnıktik jabdyǵy ornatylǵan. Osy jyldyń sońyna deıin taǵy 6 mektep «Starlink» ınternetine qosylady.
«Búgingi ınternettiń damyǵan ýaqytynda bilim alýshylardy durys baǵytqa baǵyttaý, ınternettiń kómegimen jańa bilim alýǵa úıretý, olardy kúndelikti ómirde qoldaný. Starlink joǵary jyldamdyqty ınternetti paıdalaný mektep muǵalimderiniń sabaqtaryn daıyndaýdy jáne ótkizýdi sapaly jańa deńgeıge aýystyrady, bul oqý protsesin qyzyqty etedi, búgingi kúnniń shyndyǵyna jaýap beredi, qajetti ýaqytta qajetti aqparatty beredi», - deıdi bilim basqarmasynan.
Qazaqstanda birinshi bolyp pılottyq rejımde Starlink ınternetine Qorǵaljyn aýdanynyń Maıshuqyr aýylyndaǵy orta mektep qosylǵan. Bastama bastapqyda qalalyq jáne aýyldyq mektepter arasyndaǵy orta bilim berý sapasynyń alshaqtyǵyn azaıtýǵa baǵyttalǵan.
Internet jyldamdyǵynyń artýy shalǵaıdaǵy aýyl mektepteriniń ustazdary úshin de tıimdi bolyp otyr.
«Keń jolaqty ınternet bizge standartty oqý protsesiniń sheńberinen shyǵyp, bilim berý múmkindikterin edáýir arttyrýǵa, sondaı-aq, jańa daǵdylardy ıgerý úshin kompıýterlik tehnologııalar men quraldardy paıdalanýǵa kómektesedi», - deıdi Astrahan aýdanyndaǵy Uzynkól orta mektebiniń muǵalimi Qaırat Muratov.
Óńirde Starlink spýtnıktik ınternet júıesine qosylǵan bilim oshaqtarynyń biri – Egindikól aýdanyndaǵy Kórkem orta mektebi. Jolsyz, sýsyz otyrǵan shalǵaıdaǵy Egindikól aýdanyndaǵy aýyldardyń joǵary jyldamdyqty ınernetke qosylýy qýanyshty jańalyq ekeni sózsiz.
«Mektebimiz joǵary jyldamdyqty Starlink spýtnıktik ınternetine qosylǵan. Jyldamdyǵy joǵary bolǵandyqtan balalarymyzǵa ózderiniń bilimderine qajetti derekterdi ǵalamtordan tez júktep alady. Bul árıne, balasynyń sapaly bilim alýyna alańdaıtyn ata-ana úshin úlken qýanysh», - deıdi aýyl turǵyny A.Haırýllına.
Aıta ketsek, Memleket basshysynyń tapsyrmasy boıynsha tsıfrlyq damý mınıstrligi «RǴBO»
AQ Ulttyq ǵaryshtyq baılanys operatorymen birlesip Starlink spýtnıktik ınterneti arqyly eldiń orta bilim berý mekemelerin aqparattyq-kommýnıkatsııalyq júıelerine keń jolaqty qoljetimdilikti qamtamasyz etý jónindegi pılottyq jobany iske asyryp jatyr.
2024 jyldan bastap SpaceX tehnologııalarynyń kómegimen Starlink kompanııasymen aldyn ala ýaǵdalastyq boıynsha Qazaqstannyń 2000 mektebin qosý josparlanǵan.
Aqmola oblysynda Starlink spýtnıktik ınternetin engizý boıynsha pılottyq joba aıasynda 270 bilim berý uıymyn qosý josparlanyp otyr.
