Aqmola oblysynda 264 keli balyq aýlaǵan turǵynǵa 13 mln teńge aıyppul salynýy múmkin
ASTANA. KAZINFORM – Aqmola oblysynda 32 jastaǵy turǵynnyń kóliginen 65 qap balyq tabyldy. Zańsyz aýlanǵan balyqtyń jalpy salmaǵy 264 kelini qurady, dep habarlaıdy polıtsııa departamenti.
Zerendi aýdanynyń tabıǵatty qorǵaý polıtsııasynyń qyzmetkerleri Myrzakólsor sý aıdynynda reıd júrgizý kezinde balyq resýrstaryn zańsyz aýlaý deregin anyqtaǵan.
Polıtseıler Alekseevka aýylynyń 32 jastaǵy turǵyny basqarǵan kólikti toqtatqan. Kólikti tekserý barysynda salonnan balyq salynǵan 65 qap, al júksalǵyshtan balyq aýlaýǵa arnalǵan quraldar men arnaıy kıim tabyldy.
– Zańsyz aýlanǵan balyqtyń jalpy salmaǵy 264 kelini qurady. Er adamnyń aıtýynsha, ol balyq aýlaýǵa alǵash ret shyqqan jáne aýlanǵan balyqty jeke qajetine paıdalanbaq bolǵan. Balyq resýrstaryn zańsyz aýlaý deregi boıynsha qylmystyq is qozǵaldy. Bap sanktsııasyna sáıkes, kúdiktige 3 000 AEK-ke deıin, ıaǵnı 12 975 000 teńgege deıin aıyppul salynýy, túzeý jumystaryna tartylýy, úsh jylǵa deıin bas bostandyǵy shektelýi nemese odan aıyrylýy múmkin, – dep habarlady vedomstvodan.
Jyl basynan beri Aqmola oblysynda balyq aýlaý erejelerin buzǵany úshin 260-tan astam turǵyn ákimshilik jaýapkershilikke tartylǵan.
Aıta keteıik, Almaty oblysynda 260 keli balyqty zańsyz aýlaǵan brakonerler sottaldy.
