Aqmola oblysynda 237 mln teńgelik memlekettik satyp alý konkýrstary toqtatyldy
ASTANA. KAZINFORM – Stepnogorsk qalasynyń prokýratýrasy jergilikti atqarýshy organnyń memlekettik satyp alý salasynda zańbuzýshylyqtarǵa jol bergenin anyqtady.
Prokýratýra málimetinshe, qalalyq ákimdikke qarasty laýazymdy tulǵalar memlekettik satyp alýlardy uıymdastyrý kezinde konkýrs qujattamasyna áleýetti ónim berýshilerdiń básekelesý múmkindigin shekteıtin talaptar engizgen. Sonymen qatar jetkiziletin taýardyń ulttyq standarttarǵa sáıkestigin rastaıtyn qujattar qarastyrylmaǵan.
Qadaǵalaý organy sharalarynyń nátıjesinde jalpy quny 237 mln teńgeni quraıtyn tórt memlekettik satyp alý konkýrsy joıyldy.
- Anyqtalǵan zańbuzýshylyqtar úshin Stepnogorsk qalasy turǵyn úı-kommýnaldyq sharýashylyq bóliminiń basshysyna Ákimshilik quqyq buzýshylyq týraly kodekstiń 207-babynyń 1-bóligi boıynsha 50 AEK kóleminde aıyppul salyndy. Al osy baǵytqa jetekshilik etetin qala ákiminiń orynbasary tártiptik jaýapkershilikke tartyldy, - delingen aqparatta.
Prokýratýra «Memlekettik satyp alý týraly» Zańynyń 12-babyna sáıkes konkýrs qujattamasynda ónim berýshilerdiń qatysýyn shekteıtin talaptar qoıýǵa tyıym salynatynyn eske saldy.
Aıta keteıik, Túrkistan oblysynda memsatyp alýda 8,2 mlrd teńgege negizsiz 263 kelisimshart túzilgen.