Aqmola oblysynda 221 mln teńge tabys tapqan veıp saýdasynyń arnasy joıyldy
ASTANA. KAZINFORM – Qarjylyq monıtorıng agenttiginiń Aqmola oblysy boıynsha departamenti prokýratýranyń úılestirýimen elektrondyq tutyný júıelerin (veıpterdi), olarǵa arnalǵan hosh ıistendirgishter men suıyqtyqtardy zańsyz ótkizýmen aınalysqan qylmystyq toptyń qyzmetin toqtatqanyn málim etti.
Ónimderdi ótkizý áleýmettik jelilerdegi ınternet-dúkender arqyly júzege asyrylyp, jetkizýdi kýrerlik qyzmet uıymdastyrǵan. Qatysýshylar zańsyz qyzmetin jasyrý maqsatynda konspıratsııa sharalaryn qoldanyp, aqsha qarajatyn qabyldaý jáne qolma-qol aqshaǵa aınaldyrý úshin dropperlerdiń qyzmetin paıdalanǵan.
Qylmystyq tabys kólemi 221 mln teńgeden asty. Sot sanktsııasymen kúdiktilerge tıesili páter men avtokólikke tyıym salyndy.
Uıymdastyrýshy qamaýǵa alyndy. Tergep-tekserý jalǵasyp jatyr.
Qazaqstan Respýblıkasy QPK-niń 201-babyna sáıkes ózge aqparat jarııalaýǵa jatpaıdy.
Aıta ketý kerek, jyl basynan beri Qarjylyq monıtorıng agenttigi veıpterdi zańsyz ótkizý faktileri boıynsha 12 sotqa deıingi tergep-tekserýdi bastaǵan. Zańsyz aınalymnan 717 myń dana ónim tárkilendi.
QMA eskertedi: veıpterdi paıdalaný, ásirese jasóspirimder men jastar arasynda nıkotınge táýeldiliktiń qalyptasýyna ákeledi. Nıkotın júrek-qan tamyrlary jáne júıke júıesine keri áser etip, sozylmaly aýrýlardyń damý qaýpin arttyrady.
Aıta keteıik, Batys Qazaqstan oblysynda «Kıberqadaǵalaý» júıesi arqyly elektrondyq tutyný júıelerin (veıpterdi) jáne ilespe taýarlardy jarnamalap, taratqan 20 Telegram-arna buǵattaldy.
