Aqmola oblysynda 2030 jylǵa deıin 47 jańa óndiris ornyn ashý josparlanǵan
ASTANA. KAZINFORM - Qazaqstan Respýblıkasy Premer-mınıstriniń birinshi orynbasary Nurlybek Nálibaev jumys sapary aıasynda Aqmola oblysyna kelip, óńir basshysy Marat Ahmetjanovpen birge iri jobalardyń júzege asyrylý barysymen tanysty, dep habarlaıdy Úkimettiń baspasóz qyzmeti.
Sapar barysynda energetıkalyq ınfraqurylymdy jańǵyrtý máselesine erekshe nazar aýdaryldy. Stepnogorsk qalasynda delegatsııa jylý elektr ortalyǵynda bolyp, aldaǵy jylytý maýsymyna daıyndyq jumystarymen tanysty. Kásiporynda negizgi jabdyqtardyń tozý deńgeıin 57%-ǵa deıin tómendetý boıynsha jumystar júrgizilip jatyr. Jylý jelileriniń tozý deńgeıi de 59%-ǵa deıin azaıtylǵan.
-Energııamen jabdyqtaýdyń turaqtylyǵyn arttyrý maqsatynda qazandyq agregattaryna, týrbınalarǵa, kúl qubyry men tútin murjasyna kúrdeli jáne aǵymdaǵy jóndeý jumystary qarastyrylǵan. Bul sharalar jabdyqtardyń úzdiksiz jumysyn qamtamasyz etip, paıdalaný senimdiligi men qaýipsizdigin arttyrýǵa, sondaı-aq apatty jaǵdaılardyń aldyn alýǵa múmkindik beredi, — dedi «Stepnogorsk Energokompleks» JShS bas dırektory Maqsat Ysqakov.
Sondaı-aq Nurlybek Nálibaev «Stepnogorsk taý-ken-hımııa kombınaty» JShS-de boldy, onda ýran óńdeý keshenin jańǵyrtý nátıjesinde óndiristik qýattylyq jylyna 4 myń tonnadan 6 myń tonnaǵa deıin artýda. Kásiporynda óndiristiń úzdiksiz jumysyn qamtamasyz etý jáne odan ári damytý, kadrlar daıarlaý máseleleri qarastyryldy. Óndiristi keńeıtý perspektıvalary «Stepnogorsk podshıpnık zaýyty» AQ-da da talqylandy.
Jumys sapary barysynda Premer-mınıstrdiń birinshi orynbasary «Qazaqstannyń Jylyjaı Tehnologııalary» JShS-de boldy. Kásiporyn jyl saıyn Kókshetaý, Astana jáne Petropavl qalalaryna shamamen 2,4 myń tonna kókónis pen kókshóp ónimderin jetkizedi.
Kókshetaý qalasyna sapar Savory zaýytynan bastaldy. Kásiporyn eýropalyq jabdyqtarmen jáne avtomattandyrylǵan basqarý júıesimen jabdyqtalǵan. Munda qurama jem óndirilip, ónimderi Qazaqstan óńirlerine jáne Ózbekstanǵa jóneltiledi.
Nurlybek Nálibaev oblys ortalyǵyndaǵy temirjol vokzalyn qaıta jańǵyrtý jumystarynyń barysymen de tanysty. Qurylys qarqynyn jedeldetý, onyń ishinde jumysty eki aýysymda uıymdastyrý máseleleri talqylandy.
«KAIK» JShS alańynda agroónerkásiptik sektordaǵy ınvestıtsııalyq jobalar tanystyryldy. Óńirlik mańyzy bar «Kokshe Industry» ındýstrııalyq aımaǵyn damytýǵa erekshe kóńil bólindi. Búginde munda 300-den astam jumys ornyn quratyn úsh ınvestıtsııalyq joba júzege asyrylýda. Aldaǵy ýaqytta taǵy bes iri jobany júzege asyrý jáne 2 myńǵa jýyq jańa jumys ornyn ashý josparlanǵan. 2030 jylǵa deıin jalpy sany 47 jańa óndiris ornyn iske qosý kózdelip otyr.
Jumys saparynyń sońǵy nysany «Samuryq-Energo» AQ júzege asyryp jatqan Kókshetaý qalasyndaǵy jańa jylý elektr ortalyǵynyń qurylys alańy boldy.
-Memleket basshysynyń tapsyrmasy boıynsha Kókshetaýda qýaty 240 MVt jáne jylý óndirý kólemi saǵatyna 820 Gkal bolatyn JEO salynýda. Bıyl stantsııanyń negizgi nysandarynyń irgetastaryn salý jumystary aıaqtalyp, qajetti ınfraqurylymdy turǵyzý jalǵasýda. Nysanda ekologııalyq zańnama talaptaryna sáıkes keletin zamanaýı gaz tazartý tehnologııalary qoldanylady. Qurylys kezeńinde shamamen 2,5 myń adam jumyspen qamtylsa, stansa paıdalanýǵa berilgennen keıin 400-ge jýyq maman turaqty jumyspen qamtylady, — dedi «Samuryq-Energo» AQ ınvestıtsııalar jónindegi bas dırektory Ańsar Aıdarov.
Sapar qorytyndysynda Nurlybek Nálibaev barlyq jobalardy ýaqtyly júzege asyrýdyń mańyzdylyǵyn atap ótti.
-JEO qurylysy Memleket basshysynyń erekshe baqylaýynda. Oblys ortalyǵynyń turǵyndary bul jobanyń júzege asýyn kóp jyldan beri kútip keledi. Sonymen qatar, elimizde alǵash ret 124 temirjol vokzalyn aýqymdy jańǵyrtý jumystary júrgizilýde, onyń ishinde 16 vokzal Aqmola oblysynda ornalasqan. Barlyq jobalardyń belgilengen merzimde aıaqtalýyn qamtamasyz etip, jumys qarqynyn joǵary deńgeıde saqtaý qajet, — dedi Premer-mınıstrdiń birinshi orynbasary.
Aıta keteıik, osyǵan deıin Oljas Bektenov jeńil ónerkásipti damytý tásilderin qaıta qaraýdy tapsyrǵan bolatyn.
