Aqmola oblysynda 20 adamdy aldap, 45 mln teńgeden astam shyǵyn keltirgen áıel sottaldy

Stepnogorsk qalasynyń prokýratýrasy iri mólsherde birneshe ret alaıaqtyq jasaǵany úshin aıyptalǵan qala turǵynyna qatysty qylmystyq is boıynsha memlekettik aıyptaýdy qoldady.

Tergeý materıaldaryna qaraǵanda, áıel 2023-2024 jyldary paıdakúnemdik maqsatpen azamattardy aldap, olardyń senimin paıdalanyp, turǵyn úı satyp alýǵa járdemdesýge ýáde bergen. Alaıda onyń óz mindettemelerin oryndaýǵa nıeti de, naqty múmkindigi de bolmaǵan. Soǵan qaramastan, turǵyndardan aqsha alyp, ony óz maqsatyna jumsaǵan.

— Saldarynan 20 adam jábirlenýshi dep tanylyp, olarǵa jalpy somasy 45 mln teńgeden astam materıaldyq zalal keltirilgen, — delingen habarlamada.

Sotta áıeldiń qylmys jasaǵany dáleldendi.

Stepnogorsk qalalyq sotynyń úkimimen ol QR Qylmystyq kodeksiniń 190-baby 3-bóligi boıynsha kináli dep tanylyp, 4 jyl 6 aıǵa bas bostandyǵynan aıyryldy. Úkim zańdy kúshine endi.

Prokýratýra azamattardy mámile jasasý kezinde, ásirese turǵyn úı satyp alýǵa qatysty máselelerde, saq bolýǵa úndedi. Qyzmettiń shynaıylyǵyn, tulǵalardyń ókiletin jáne aqsha alýǵa zańdy negizderiniń bar-joǵyn tekserý qajet.

Prokýratýra sondaı-aq tıisti qujattary men zańdy kepildikteri joq bolsa da, turǵyn úı máselesin tıimdi sharttarmen sheshýge ýáde beretin adamdarǵa senbeýge shaqyrdy. Mundaı usynystar alaıaqtyqtyń belgisi bolýy múmkin.

Eske salaıyq, buǵan deıin Aqtaýda stýdentterdi joǵary baǵa alyp beremin aldaǵan alaıaq sottalǵanyn jazǵanbyz.