Aqmola oblysynda 2 myńnan astam jol-kólik oqıǵasy tirkeldi, zardap shekkender joq
ASTANA. KAZINFORM - 12 qazanda Aqmola oblysynda polıtseıler qolaısyz aýa raıyna baılanysty kúsheıtilgen rejımde jumys istedi. Óńirde 2 myńnan astam JKO tirkeldi. Zardap shekkender joq, dep habarlaıdy Polisia.kz.
Jol apatynyń aldyn alý úshin birneshe tasjolda kólik qozǵalysy shekteldi. Biraq osyǵan qaramastan, bul kúni oblys aýmaǵynda 2400-den astam jol apaty tirkeldi.
Zardap shekkender joq. Alaıda kólikterge túrli zaqym keltirildi.
JKO-nyń biri Astana – Petropavl avtojolynyń 155-shaqyrymnda boldy. Júk kóliginiń 34 jastaǵy júrgizýshisi aýa raıyn (kóktaıǵaq, jel) eskermeı, róldi basqara almaı, bórenege soqtyǵysty.
Oqıǵa ornyna barǵan tártip saqshylary júk kóligin jolǵa shyǵarýǵa kómektesip, qaýipsizdikti qamtamasyz etti.
Júrgizýshi QR ÁQBtK-niń 610-baby 1-bóligi (Kólik quraldarynyń júrgizýshileriniń adamdardyń densaýlyǵyna zııan keltirýge, kólik quraldarynyń nemese ózge de múliktiń zaqymdalýyna ákep soqqan jol júrisi erejelerin buzýy) boıynsha ákimshilik jaýapkershilikke tartyldy.
Aıta keteıik, jol qozǵalysyn shekteý kezinde Şýchınsk qalasyna deıin 740 kólikke, onyń ishinde 600 jeńil jáne 140 júk kóligine, Kókshetaý qalasynan Astana qalasyna deıin 565 kólikke, onyń ishinde 470 jeńil jáne 94 júk kóliginiń júrgizýshilerine kómek kórsetildi.
