Aqmola oblysynda 2 myńǵa jýyq jer paıdalanýshynyń derbes derekteri jarııalanyp ketken
ASTANA. KAZINFORM — Aqmola oblysy Birjan sal aýdanynyń prokýratýrasy derbes derekterdi qorǵaý týraly zańnamany buzǵan sheshimniń kúshin joıdy.
— Taldaý barysynda Birjan sal aýdandyq máslıhatynyń sheshimimen (2024 jylǵy 25 jeltoqsandaǵy №S-18/3) Jaıylymdardy basqarý jáne olardy paıdalaný jónindegi jospar bekitilgeni, ol 2 000-ǵa jýyq jer paıdalanýshylardyń derbes derekteri, onyń ishinde T.A.Á., JSN, BSN, sondaı-aq kadastrlyq nómirleri men jaıylymdyq jerlerdiń alańy kórsetilgen ózderine tıesili jer ýchaskeleri týraly málimetterdiń ashyq qoljetimdilikte ornalastyrylǵany anyqtaldy, — delingen habarlamada.
Mundaı málimetterdi ashyq qoljetimdilikte ornalastyrý Qazaqstan Respýblıkasy Konstıtýtsııasynyń 21-babyna, «Derbes derekter jáne olardy qorǵaý týraly» Zańyna qaıshy keledi, sondaı-aq olardyń zańsyz, onyń ishinde alaıaqtyq maqsatta paıdalanylýyna jaǵdaı týǵyzady.
Prokýratýranyń narazylyǵy boıynsha máslıhat sheshiminiń kúshi joıylyp, aıtarlyqtaı mólsherdegi azamattardyń konstıtýtsııalyq quqyqtary qorǵaldy.
Aıta ketelik Astana prokýratýrasy 80 myńnan astam kásipkerdiń quqyǵyn qorǵaǵan edi.
