Aqmola oblysynda 18 jastaǵy jigit tokqa túsip qaza tapty
ASTANA. KAZINFORM – Aqmola oblysynda ǵımarattyń qasbetin bólshekteý kezinde 18 jastaǵy jigitti tok soǵyp, kóz jumdy. Onymen birge bolǵan kámeletke tolmaǵan jasóspirim aýrýhanaǵa jetkizildi, dep habarlaıdy Kazinform tilshisi.
Aqmola oblysy polıtsııa departamentiniń baspasóz qyzmetiniń málimetinshe, 22 shilde kúni Kókshetaý qalalyq polıtsııa basqarmasynda 2008 jyly týǵan jas jigittiń elektr togynan qaza bolý deregi tirkelgen.
– Aldyn ala málimet boıynsha, Táshenov kóshesindegi ǵımarattyń qasbetin bólshekteý kezinde metall profıl elektr berý jelisine tıip ketken. Sonyń saldarynan jas jigit óte aýyr elektr jaraqatyn aldy. Onyń janynda bolǵan kámeletke tolmaǵan jasóspirim de elektr jaraqatymen aýrýhanaǵa jetkizildi, – dep habarlady vedomstvo.
Oqıǵaǵa baılanysty eńbek qaýipsizdigi qaǵıdalaryn buzý faktisi boıynsha sotqa deıingi tergep-tekserý bastaldy. Qajetti saraptamalar taǵaıyndalyp, tergeý amaldary júrgizilip jatyr.
– Tergeý nátıjesi boıynsha barlyq qatysy bar tulǵalardyń áreketine quqyqtyq baǵa beriledi. Zańda kózdelgen negizder bolǵan jaǵdaıda kináliler Qazaqstan Respýblıkasynyń zańnamasyna sáıkes jaýapqa tartylady, – dep málimdedi polıtsııa.
Aqmola oblystyq densaýlyq saqtaý basqarmasynyń málimetinshe, ekinshi zardap shekken jasóspirim kópbeıindi oblystyq balalar aýrýhanasyna jetkizilgen.
– Naýqastyń jaǵdaıy turaqty. Ómirine tikeleı qaýip joq. Ol birneshe saǵat jansaqtaý bóliminde dárigerlerdiń baqylaýynda boldy. Qazirgi ýaqytta barlyq qajetti medıtsınalyq kómekti alyp jatyr, – dedi dárigerler.
Buǵan deıin Semeıde Semeıde eki bala sýǵa batyp ketkenin habarladyq.
