Aqmola oblysynda 17 myńnan astam jaıaý júrginshi jaýapkershilikke tartyldy
ASTANA. KAZINFORM — Aqmola oblysynda mektepter mańyndaǵy jol qaýipsizdigi kúsheıtildi. Jyl basynan beri polıtsııa 523 ret tekserý júrgizip, jol qozǵalysy erejesin buzǵan 17 myńnan astam jaıaý júrginshini jaýapkershilikke tartty.
— Aqmola oblysynda oqýshylardyń qaýipsizdigi úshin birqatar shara qolǵa alyndy. «Nazar aýdaryńyz, balalar!» jáne «Nazar aýdaryńyz, jaıaý júrginshi!» jedel-profılaktıkalyq is-sharalary sheńberinde polıtsııa qyzmetkerleri mektepterdiń janyndaǵy joldardy zerttep, qaýipti ýchaskelerdi anyqtap, kemshilikterdi joıýǵa atsalysady, — delingen Polisia.kz aqparatynda.
Aqmola oblysy Polıtsııa departamenti ÁPB bastyǵynyń orynbasary Azamat Baıǵazınniń aıtýynsha, jumys naqty nátıjelerge qol jetkizdi.
Bilim berý uıymdarynyń mańyndaǵy aýmaqtarǵa da erekshe kóńil bólinýde. Bul jerlerde 914 «Nazar aýdaryńyz, balalar!» belgisi, 690 jaıaý júrginshiler ótkeli belgisi, 500 jyldamdyqty shekteý belgisi jáne 192 jasandy jol kedergisi ornatyldy. Sonymen qatar 301 bilim berý uıymynyń janynda jol belgileri qoıylǵan.
— Alaıda qaýipsizdik tek jol belgilerimen shektelmeıdi. Polıtsııanyń bastamasy jáne baqylaýy boıynsha 185 nysan jaryqtandyrylyp, 76 nysanǵa trotýar, 82 nysanǵa jol qorshaýlary ornatyldy. Sonymen qatar bes nysanǵa baǵdarsham qoıyldy, — delingen aqparatta.
Jyl basynan beri polıtsııa qyzmetkerleri kóshe-jol jelisine 523 tekserý júrgizdi. Anyqtalǵan kemshilikterdiń qorytyndysy boıynsha 523 nusqama berildi — jaýapty qyzmetter buzýshylyqtardy joıyp, jol ýchaskelerin qaýipsizdik talaptaryna sáıkes keltirýge tıis.
Bul rette baqylaý tek joldardyń jaı-kúıine jáne júrgizýshilerdiń minez-qulqyna ǵana qatysty emes. Polıtseıler jaıaý júrginshilerdiń ózderine erekshe nazar aýdarady.
— Jyl basynan beri jol qozǵalysy erejelerin buzǵany úshin 17 172 jaıaý júrginshi ákimshilik jaýapkershilikke tartyldy. Polıtsııanyń jumysy turaqty túrde jalǵasýda: joldar tekserilip, anyqtalǵan kemshilikter joıylýda jáne quqyq buzýshylyqtardyń aldyn alý sharalary júrgizilýde. Basty maqsat — ár balanyń mektepke qaýipsiz baryp, úıine aman oralýyn qamtamasyz etý, — delingen aqparatta.
Buǵan deıin Astanada 20 myńnan astam jaıaý júrginshi jol erejesin buzǵany týraly jazdyq.
