Aqmola oblysynda 140 fermer kúzgi egin oraǵyna qajetti janar-jaǵarmaısyz qalǵan

Jarqaıyń aýdanynda 140 fermer temirjol joldyń aqaýyna baılanysty kúzgi egin oraǵyna qajetti arzandatylǵan janar-jaǵarmaıdy ala almaǵan, dep habarlaıdy QazAqparat tilshisi Aqmola oblysy prokýratýrasynyń baspasóz qyzmetine silteme jasap.

Jarqaıyń aýdanynyń prokýratýrasy aýdannyń aýyl sharýashylyǵy taýar óndirýshilerin arzandatylǵan dızel otynymen qamtamasyz etýde másele týyndaǵanyn anyqtady.

Prokýratýranyń málimetinshe, bıylǵy jyly 19 vagonmen «Derjavınskaıa» stantsııasyna fermerler úshin bólingen 9 myń tonna janar-jaǵarmaı jetkizildi.

Alaıda, arzandatylǵan janar-jaǵarmaı jetkizýshi operator - Jarqaıyń munaı bazasy, aǵymdaǵy jyldyń tamyz aıynan bastap temirjol joldarynyń aqaýlaryna baılanysty shyǵynǵa ushyrap, júk qabyldaı almaǵan (vagondar relsten eki ret shyǵyp ketti).

Saldarynan, 140 fermer egin oraǵyna qajetti janar-jaǵar maımen qamtamasyz etilmeı qaldy.

«Osyǵan baılanysty, aýdan prokýratýrasy ýákiletti organnyń atyna zań buzýshylyqtardy joıý týraly usynys engizdi, ony qaraý nátıjeleri boıynsha temirjol qyzmeti talapqa sáıkes keltirildi jáne fermerler ózderine tıesili arzandatylǵan otyndy aldy. Prokýrorlyq qadaǵalaý sharalary egin jınaý naýqany kezinde qolaısyz aýa-raıynan týyndaǵan fermerlerdiń yqtımal shyǵyndaryn azaıtýǵa múmkindik berdi, sondaı-aq jóndelgen temirjol jolyn paıdalanatyn basqa kásipkerlerdiń quqyqtaryn iske asyrýǵa yqpal etti, - dedi vedomstvodan.

Aıta ketsek, budan buryn Aqmola oblysynda 30 myńnan astam jaıylymdyq jer muqtaj aýyldarǵa berilgenin jazǵan edik.