Aqmola oblysynda 14 jastaǵy qyzdy óltirgen er adam ómir boıyna bas bostandyǵynan aıyryldy
ASTANA. KAZINFORM – Aqmola oblysynyń Tselınograd aýdanynda 14 jastaǵy qyzdy óltirgeni úshin sottalǵan er adamǵa ómir boıyna bas bostandyǵynan aıyrý jazasy kesildi.
Eske salaıyq, byltyr qarasha aıynda Tselınograd aýdanynyń Yntymaq aýylynda 14 jastaǵy qyzdyń óltirilgeni belgili bolǵan edi.
Qylmys jasaǵan 35 jastaǵy er adam oqıǵa ornynan boı tasalamaq bolǵanymen, polıtseıler ony bir táýlikke jetpeı ustady. Tergeý Aqmola oblysy polıtsııa departamenti basshylyǵynyń erekshe baqylaýynda boldy.
Ótken aptada kúdiktige qatysty sot úkimi shyqty. Aqmola oblystyq sotynyń baspasóz qyzmeti is kámeletke tolmaǵan balanyń jynystyq qol suǵylmaýshylyǵyna qatysty bolǵandyqtan, onyń mán-jaıyn jarııalaýdan bas tartty.
Sottalýshyǵa Qylmystyq kodekstiń tórt birdeı baby boıynsha aıyp taǵyldy. Atap aıtqanda:
· 120-baptyń 4-bóligi – kámeletke tolmaǵan adamdy zorlaý;
· 122-baptyń 4-bóliginiń 1-tarmaǵy – on alty jasqa tolmaǵan adammen birneshe ret jynystyq qatynasqa túsý nemese ózge de seksýaldyq sıpattaǵy áreketter jasaý;
· 115-1-bap – stalkıng;
· 99-baptyń 2-bóliginiń 14-tarmaǵy – kámeletke tolmaǵan adamdy qasaqana óltirý.
– QR Qylmystyq kodeksiniń 58-babynyń 4-bóligine sáıkes, qylmystyq quqyq buzýshylyqtardyń jıyntyǵy boıynsha jeńilirek jazany neǵurlym qatań jazaǵa sińirý arqyly V.-ǵa túpkilikti jaza retinde ómir boıyna bas bostandyǵynan aıyrý jazasy taǵaıyndaldy. Sonymen qatar Qylmystyq kodekstiń 50-babynyń 2-bóligine sáıkes, oǵan ómir boıyna pedagogıkalyq qyzmetpen aınalysýǵa jáne kámeletke tolmaǵan balalarmen jumys isteýge baılanysty laýazymdardy atqarýǵa tyıym salyndy, – delingen sot úkiminde.
Eske salaıyq, buǵan deıin bıyl Qazaqstanda qandaı qylmystar úshin ómir boıyna bas bostandyǵynan aıyrý jazasy taǵaıyndalǵany týraly jazǵan bolatynbyz.
