Aqmola oblysynda 13 myńnan astam turǵyn tabıǵı gazǵa qol jetkizdi
ASTANA. KAZINFORM - Energetıka mınıstrligi Aqmola oblysynyń ákimdigi jáne «QazaqGaz» ulttyq kompanııasymen birlesip, Aqmola oblysynyń Talapker jáne Altynsarın aýyldarynda jańa gazben qamtý nysandaryn iske qosty.
Atalǵan jobalardy iske asyrý 13,8 myńnan astam adamdy tabıǵı gazben qamtamasyz etýge múmkindik berdi. Bul aýyl turǵyndarynyń ómir súrý sapasyn arttyrýǵa, ekologııalyq jaǵdaıdy jaqsartýǵa jáne óńirdiń ınjenerlik-kommýnaldyq ınfraqurylymyn damytýǵa mańyzdy qadam bolmaq.
Jobalar halyqtyń tabıǵı gazǵa qoljetimdiligin kezeń-kezeńimen keńeıtýge baǵyttalǵan Qazaqstandy gazdandyrýdyń Bas shemasy aıasynda júzege asyryldy. Memleket basshysynyń tapsyrmasyn oryndaý maqsatynda, elimiz boıynsha 2025 jyldyń basynda gazdandyrý deńgeıi 62,4%-dy qurady, ıaǵnı 12,6 mln adam tabıǵı gazben qamtamasyz etilgen.
Bıyl da gazdandyrý jumystary jalǵasyp jatyr. Búgingi tańda 81 jobany aıaqtaý josparlanǵan, sonyń nátıjesinde 94 eldi mekenniń shamamen 300 myń turǵyny tabıǵı gazǵa qol jetkizedi. Osylaısha, jyl qorytyndysy boıynsha Qazaqstandaǵy gazdandyrý deńgeıi 63,8%-ǵa jetedi.
Eske salsaq, osyǵan deıin Energetıka mınıstrligi tabıǵı gaz óndirisiniń tómendegeni týraly aqparatty joqqa shyǵarǵanyn jazǵanbyz.