Aqmola oblysynda 12 myńǵa jýyq bala birinshi synypqa qabyldandy

ASTANA. KAZINFORM – Aqmola oblysynda jańa oqý jylynda 12 myńnan astam bala mektep tabaldyryǵyn attaıdy.

Oblystyq bilim basqarmasynyń málimetinshe, óńirde qazirgi ýaqytta 11 900-den astam bala 1-synypqa qabyldanǵan. Degenmen 1 qyrkúıekke deıin bul kórsetkish taǵy ósip, 12 myńnan asýy múmkin.

– Jańa oqý jylynda oblystyń 520 memlekettik mektebinde 140 myńnan astam oqýshy bilim alady. Onyń ishinde 12 myńnan astamy – birinshi synyp oqýshylary, – dep atap ótti basqarma ókilderi.

Sonymen qatar tehnıkalyq jáne kásiptik bilim berý júıesinde de ósim baıqalady. Óńirdegi 29 kolledjde shamamen 20 myń stýdent bilim alady. Memlekettik bilim berý tapsyrysy aıasynda 5,7 myń mektep túlegi oqýǵa qabyldanýda.

Buǵan deıin Pavlodar oblysynda 10 myńnan astam, al Batys Qazaqstan oblysynda shamamen 12 myń balanyń birinshi synypqa qabyldanǵany habarlanǵan bolatyn.

Birinshi synypqa qujat 31 tamyzǵa deıin qabyldanady.