Aqmola oblysynda 10 jastaǵy bala sýǵa batyp ketti
ASTANA. KAZINFORM – Aqmola oblysyndaǵy sý aıdyndarynda bir kúnde balalarǵa qatysty eki oqıǵa boldy. Olardyń biri, kámeletke tolmaǵan bala qaza tapty, dep habarlaıdy Kazinform tilshisi.
Aqmola oblysy Tótenshe jaǵdaılar departamenti baspasóz qyzmetiniń habarlaýynsha, 3 maýsym kúni Qosshy qalasynda qaıǵyly oqıǵa boldy. Nura-Esil kanalyna dosymen birge shomylýǵa barǵan 10 jastaǵy bala sýǵa batyp ketti. Qaıǵyly oqıǵa bolǵan toǵan sýǵa túsýge arnalmaǵan. Onyń aýmaǵynda shomylýǵa tyıym salatyn belgiler bar.
- Astana qalalyq TJD jedel-qutqarý toby balanyń denesin taýyp, sýdan shyǵardy, - dep túsindirdi Aqmola oblystyq TJD resmı ókili Ersaıyn Qoıshybaev.
Sol kúni Zerendi aýdanynda qaıǵyly oqıǵanyń aldyn aldy. Bul jerde «D»-esepte turǵan bala qaraýsyz qalǵannan keıin joǵalyp ketken. Balanyń aıaq kıimi jaǵadan tabylǵan soń ony izdeýge súńgýirler shaqyrylmaq bolǵan kezde ol aman-esen tabyldy. Belgili bolǵandaı, ol aıaq kıimin sheship, jaǵalaý boıymen jalǵyz serýendep ketken.
- Ata-analarǵa úndeý tastaımyz: balalardy sý aıdyndary janynda qaraýsyz qaldyrmańyz. Sondaı-aq, tek belgilengen jerlerde ǵana shomylýǵa ruqsat etilgenin umytpańyz, - delingen qutqarýshylardyń aımaq turǵyndaryna joldaǵan sózinde.
Osyǵan deıin Qaraǵandyda sýǵa túsýge tyıym salynǵan jerde shomylǵan 2004 jáne 2005 jylǵy eki jas jigit sýǵa batyp ketkenin jazdyq.
