Aqmola oblysynan shyǵatyn ónimderdiń sapasyna basymmen jaýap berem – Marat Ahmetjanov

Aqmola oblysynyń ákimi Marat Ahmetjanov úıinde qandaı ónim tutynatynyn aıtty, dep habarlaıdy Kazinform.

«Aqmola oblysynda turǵandyqtan, árıne, sol óńirdiń ónimderin tutynamyn. Tek qana dámin tatyp júrgen joqpyn. Qalaı óndiriletinin de kórdim. Ekologııalyq turǵydan óte taza, gendik-modıfıkatsııalyq qospasyz ónimderi. Astana qalasynyń 44 sýpermarketinde Aqmola oblysynyń ónimderi satylyp tur. Olardyń sapasyna jeke basymmen jaýap bere alam. Óıtkeni qalaı jasalyp jatqanyn, qandaı zalalsyz jaǵdaıda óndiriletinin kórgenmin», - dedi aımaq basshysy.

Marat Ahmetjanov Aqmola oblysynda óndiriletin un sapasyna jeke toqtaldy.

«Bizdiń un tek Qazaqstanda ǵana emes, álemde tanymal. Aqmola oblysyndaǵy astyqtyń sapasy álemde eń joǵary bolyp esepteledi. Odan bólek Makın qus fabrıkasy bar. Jyl saıyn 80 myń qus etin shyǵaramyz. Qazir qus etiniń túrli ónimin usynyp otyr. «Qazger-Qus», «Ijev» qus fabrıkalary shyǵaratyn jumyrtqalar Astananyń búkil dúken sórelerinde tur. «Rodına» atty áıgili keńsharymyzdyń sút ónimderi de jappaı dúkenderde tur. Jeńildetilgen nesıe arqasynda taǵy 15 mlrd teńgege 7 taýarly sút fermasy qurylyp jatyr. Olar da Astana men ózge de óńirlerdi sapaly sút ónimderimen qamtamasyz etedi», - dedi ákim.