Aqmola oblysynan myńǵa jýyq azamat áskerge shaqyrylady
ASTANA. KAZINFORM – 2026 jylǵy kúzgi áskerge shaqyrý naýqany aıasynda Aqmola oblysynan myńǵa jýyq azamat merzimdi áskerı qyzmetke jiberiledi.
Aqmola oblysy Qorǵanys isteri jónindegi departamenti bastyǵynyń orynbasary, podpolkovnık Erbolat Ótepovtiń aıtýynsha, kúzgi áskerge shaqyrý naýqany Qazaqstannyń barlyq óńirindegideı 1 qyrkúıekte bastalyp, 2026 jyldyń jeltoqsan aıynyń sońyna deıin jalǵasady.
Áskerge shaqyrý naýqany QR Prezıdentiniń 2026 jylǵy 14 naýryzdaǵy №1202 Jarlyǵy negizinde júrgiziledi.
– Áskerge shaqyrýdy keıinge qaldyrýǵa nemese odan bosatylýǵa quqyǵy joq 18-27 jas aralyǵyndaǵy er azamattar shaqyrylady. Áskerı qyzmet merzimi – 12 aı. Aqmola oblysy boıynsha áskerge shaqyrylatyndardyń jalpy sany shamamen 1 myń adamdy quraıdy, – dedi Erbolat Ótepov.
Aqmola oblysynyń qalalary men aýdandarynan shaqyrylǵan azamattar birneshe áskerı qurylymda qyzmet etedi. Olardyń 500-den astamy QR Qarýly kúshterine, shamamen 350-i Ulttyq ulanǵa, 130-ǵa jýyǵy UQK Shekara qyzmetine jiberiledi. Budan bólek, 20-dan astam azamat QR Tótenshe jaǵdaılar mınıstrliginiń bólimderinde, 10-ǵa jýyǵy Memlekettik kúzet qyzmetinde áskerı boryshyn óteıdi.
Erbolat Ótepovtiń aıtýynsha, shaqyrý qaǵazy azamatqa keletin kúnge deıin keminde úsh táýlik buryn tıisti tártippen jiberiledi.
– Shaqyrý qaǵazdary tıisti tártippen, kelý kúninen keminde úsh táýlik buryn jiberiledi. Onyń ishinde jeke SMS-habarlamalar jáne eGov portalyndaǵy habarlandyrýlar arqyly jetkiziledi. Tirkeý, áskerge shaqyrýdy keıinge qaldyrý nemese odan bosatý, sondaı-aq turǵylyqty jerin aýystyrǵan kezde áskerı esepke qoıý protsesteri eGov arqyly tsıfrlyq formatqa kóshirildi, – dedi ol.
Merzimdi áskerı qyzmetshiler úshin birqatar áleýmettik kepildik qarastyrylǵan. Sonyń biri – áskerı qyzmet atqaratyn kezeńde kredıtter men mıkrokredıtter boıynsha tólemderdi keıinge qaldyrý.
Sondaı-aq áskerı qyzmet nátıjesi boıynsha UBT tapsyrmaı joǵary oqý oryndaryna túsýge grant alý múmkindigi bar.
– Aqmola oblysynyń barlyq aýdany men qalasynda, sonyń ishinde Kókshetaýda shaqyrý jáne medıtsınalyq komıssııalar azamattardy irikteý men medıtsınalyq kýálandyrý jumystaryna kiristi, – dedi Erbolat Ótepov.
Aıta keteıik, merzimdi áskerı qyzmetke shaqyrý tártibine qandaı ózgerister engizilgenin mynaý silteme arqyly oqı alasyz.
