Aqmola oblysyna poıyzben kelgen jolaýshylar sany 296 myńǵa jetti
ASTANA. KAZINFORM – Jyl basynan beri Aqmola oblysyna temirjol kóligimen 296 myń jolaýshy qatynady, dep habarlaıdy Kólik mınıstrligi.
Mınıstrliktiń málimetinshe, óńirde qaıta jańǵyrtý jumystarynan keıin Býrabaı, Shortandy, Makınka jáne Aqkól stantsııalarynyń vokzaldary paıdalanýǵa berildi.
– Jyl basynan beri Aqmola oblysyna baǵyttalǵan temirjol kóligi boıynsha jolaýshylar aǵyny 296 myń adamdy qurady. Qaıta jańǵyrtylǵan vokzaldar jolaýshylarǵa kórsetiletin qyzmet sapasyn arttyryp, týrıstik baǵyttardyń qoljetimdiligin jaqsartýǵa múmkindik beredi, – delingen habarlamada.
1988 jyly salynǵan Býrabaı kýrorty vokzaly táýligine orta eseppen 1 601 jolaýshyǵa qyzmet kórsetedi. Jazǵy maýsymda bul kórsetkish 2 myń adamǵa deıin artady.
Úsh qabatty vokzal ǵımaratynyń jalpy aýdany 3,2 myń sharshy metrden asady. Stantsııa arqyly Astana, Almaty, Atyraý, Petropavl, Qyzylorda, Oral, Qaraǵandy qalalaryna, sondaı-aq Reseı men Qyrǵyzstanǵa qatynaıtyn 30 jolaýshylar poıyzy ótedi.
Sonymen qatar Shortandy, Makınka jáne Aqkól stantsııalary arqyly 14 jolaýshylar poıyzy qatynaıdy.
Aıta keteıik, Qazaqstanda jańǵyrtýdan keıin 30 vokzal iske qosyldy.
