Aqmola oblysyndaǵy órtten zardap shekkenderge medıtsınalyq jabdyq jetkizildi
BÝRABAI. KAZINFORM — Aqmola oblysynyń Şýche qalasynda órtten zardap shekkenderge gemodıafıltratsııa protsedýrasyn júrgizý úshin qajetti medıtsınalyq jabdyqtar jetkizilip, mamandar shaqyryldy, dep habarlaıdy Kazinform agenttiginiń tilshisi.
Aqmola oblysynyń Densaýlyq saqtaý basqarmasy baspasóz qyzmetiniń habarlaýynsha, 2026 jylǵy 28 aqpanda Ulttyq shuǵyl medıtsınany úılestirý ortalyǵynyń mamandarymen telemedıtsınalyq keńes ótkizilgen. Keńes qorytyndysy boıynsha gemodıafıltratsııa (GDF) júrgizý qajettigi anyqtalyp, qajetti medıtsınalyq jabdyqtar jedel jetkizilip, mamandar shaqyrylǵan.
— Gemodıafıltratsııa – bul qazirgi zamanǵy búırekti almastyratyn terapııa ádisi, ol qannyń dıffýzııalyq jáne konvektıvtik joldarymen tazalanýyn biriktiredi. Bul ádis tómen, ortasha jáne ishinara úlken molekýlalyq toksınderdi tıimdi ketirýge múmkindik beredi, sondyqtan aýyr jaǵdaıdaǵylar úshin asa mańyzdy, — dedi vedomstvo ókilderi.
Medıtsınalyq brıgadalar joǵary tehnologııalyq múmkindikterdi paıdalanyp, zardap shekkenderge barlyq qajetti kómek kórsetýdi jalǵastyryp jatyr.
Eske sala keteıik, Býrabaı aýdanynyń Şýchınsk qalasynda turǵyn úıge japsarlas salynǵan bir qabatty kafede gaz-aýa qospasynyń jarylysy bolyp, artynsha órt shyqty. Sońǵy málimetter boıynsha, zardap shekkender sany 28 adamǵa jetti. Olardyń jeteýi qaza taýyp, 10 adam jansaqtaý bóliminde jatyr, qalǵandaryna qajetti medıtsınalyq kómek kórsetilip jatyr.
Artynsha Şýchınskidegi jarylysqa baılanysty qylmystyq is qozǵaldy.
Şýchedegi jarylysta qaza tapqandardyń otbasyna 2 mln teńgeden beriletini habarlandy.
Şýchınsk qalasyndaǵy oqıǵany tergeıtin komıssııa quryldy.
Qaza tapqandardyń asyraýynda eńbekke qabiletsiz otbasy músheleri bolǵan jaǵdaıda, olardyń otbasylaryna respýblıkalyq bıýdjetten asyraýshysynan aıyrylý jaǵdaıy boıynsha memlekettik áleýmettik járdemaqy taǵaıyndalatyny belgili boldy.
Býrabaıdaǵy órtten zardap shekken bes adam Astanaǵa jetkizildi.
Al búgin Aqmola oblysynyń dárigerleri áleýmettik jelilerde taralǵan Şýchınskide «Palaý ortalyǵy» kafesinde bolǵan órtten zardap shekkenderge shuǵyl qan qajet degen aqparatty joqqa shyǵardy.