Aqmola oblysyna qalmaq tuqymdy 4 300 bas iri qara mal ákelindi

ASTANA. KAZINFORM - Ákelingen maldyń barlyǵy qajetti veterınarııalyq rásimderden ótip, esepke qoıyldy. Bul týraly AShM baspasóz qyzmeti habarlady. 

Ereımentaý aýdanynyń Torǵaı aýylynda et klasterin qurý jónindegi ınvestıtsııalyq jobany iske asyrý jalǵasyp jatyr. Joba aıasynda oblysqa qalmaq asyl tuqymdy 4 300 analyq iri qara mal jetkizildi.

Qalmaq tuqymy et baǵytyndaǵy mal sanatyna jatady jáne joǵary ónimdiligimen, jaıylymdyq jaǵdaıda ustaýǵa beıimdiligimen, sondaı-aq qatań klımattyq jaǵdaılarǵa tózimdiligimen erekshelenedi. Ákelingen maldyń barlyǵy qajetti veterınarııalyq rásimderden ótip, esepke qoıyldy.

Aldaǵy ýaqytta qosymsha taǵy 5 myń bas asyl tuqymdy analyq iri qara mal ákelý josparlanyp otyr.

Investorlardyń josparlaryna sáıkes, 2031 jylǵa deıin asyl tuqymdy reprodýktorlardaǵy iri qara mal sany 22,5 myń basqa deıin jetkizilip, bordaqylaý kesheniniń qýattylyǵy 30 myń basqa deıin artpaq.

Et klasterin iske asyrý asyl tuqymdy mal ósirýden bastap, bordaqylaý jáne joǵary sapaly sıyr etin óndirý men ótkizýge deıingi turaqty óndiristik tizbekti qalyptastyrýǵa baǵyttalǵan.

Joba óńirdiń et ónimderi naryǵyndaǵy pozıtsııasyn nyǵaıtyp, agroónerkásip kesheniniń eksporttyq áleýetin arttyrýǵa jáne Ereımentaý aýdany turǵyndary úshin jańa jumys oryndaryn qurýǵa múmkindik beredi.

Aıta ketý kerek, Ereımentaý aýdany jaıylymdyq resýrstarǵa óte baı — munda oblystaǵy eń iri jaıylymdyq alqaptardyń biri shoǵyrlanǵan, bul mal sharýashylyǵyn damytýǵa qolaıly jaǵdaı jasaıdy.

Qazirgi ýaqytta aýdanda «Jańa Bereke reprodýktor» jáne «Ereımentaý – Astyq 2014» iri bordaqylaý alańdary, sondaı-aq mal basy 100-den 550 basqa deıin jetetin birqatar orta jáne iri et fermalary jumys istep jatyr.

Et klasteriniń damýy Aqmola oblysynyń agrarlyq áleýetin nyǵaıtýdaǵy mańyzdy qadam. Ol óńirdiń tabıǵı jáne ınvestıtsııalyq múmkindikterin tıimdi paıdalanýǵa jol ashady.

Aıta ketelik malshylarǵa qatysty jańa sheshimder ázirlenip jatyr.