Aqmola oblysyna Astana qalasynan 85-ke jýyq tehnıka kómekke keldi
KÓKShETAÝ. KAZINFORM – Aqmola oblysynda sý tasqynyna qarsy is-sharalar jalǵasyp jatyr.
Astanalyq aýdandarǵa ekskavator, samosval jáne tıegishter bar 85-ke jýyq tehnıka elordadan kómekke keldi. Bul tehnıkalarmen Qosshy qalasynyń Taıtóbe kenti tusyndaǵy Nura ózeniniń jaǵalaýyn nyǵaıtý jumystary júrgizilýde.
Aqmola oblysy ákimdiginiń málimetinshe, aımaq basshysy Marat Ahmetjanov óńirde sý tasqynyna qarsy júrgizilip jatqan jumystardy baryp kórdi.
Qosshy qalasynyń 19 jáne 20 shaǵyn aýdandarynda sý tasqynyn boldyrmaý baǵytynda aýqymdy jumystar qolǵa alynǵan. Buǵan qutqarýshylar men kommýnaldyq qyzmetterden bólek, 200-ge jýyq erikti, qoǵam belsendileri jáne turǵyndar atsalysýda. Olar qum salynǵan qaptardy tósep, bógetterdi topyraqpen nyǵaıtyp jatyr.
Arshaly aýdanynyń Jibek joly aýylynda Esil ózeniniń jaǵasy men Bezymıannaıa bógetiniń syrtynan topyraqtan turǵyzylǵan bógetti nyǵaıtý jáne uzartý jumystary táýlik boıy úzilisiz júrgizilýde. Oǵan 45 arnaıy tehnıka tartylǵan. Onyń 25-i elordadan, 20-sy jergilikti tehnıka. Buǵan qosa, qum toltyrylǵan 2 myń qap tóseldi, taǵy osyndaı 3 myń qap ázirlendi.
Túngi ýaqytta Jibek joly kentinde aǵyn sýdyń deńgeıin baqylaý úshin mobıldi beketter qoıyldy.
Aıta ketsek, budan buryn Aqmola oblysynda sý tasqynyna qarsy jumystar jalǵasyp jatqanyn jazǵan edik.
