Aqmola oblysyna 660 mlrd teńgeden astam ınvestıtsııa tartyldy
ASTANA. KAZINFORM — Bul ótken jyldyń osy kezeńimen salystyrǵanda 250 mlrd teńgege kóp. Bul jańa kásiporyndar men tehnologııalar jáne jumys oryndary arqyly qamtamasyz etilgen naqty ósim.
Tórt ındýstrııalyq aımaqtyń, onyń ishinde respýblıkalyq «AQMOLA» aımaǵynyń qurylýy ınvestıtsııa tartýdyń negizgi quraly. Respýblıkalyq ındýstrııalyq aımaq ınvestorlar úshin naǵyz tartymdy ortalyqqa aınalyp otyr.
Onda jalpy quny 1 trln teńgeden asatyn jobalar jınaqtaldy. Bul 4 myńnan astam jańa jumys ornyn ashýǵa múmkindik beredi.
— Búgingi tańda astyqty tereń óńdeıtin alǵashqy zaýyttyń qurylysy bastaldy. Dalıan, Qytaı — 795 mlrd teńge, 3000-ǵa deıin jumys orny, memlekettik saraptamadan ótý úshin jobalyq-smetalyq qujattamany daıyndaý jumystary júrgizilip jatyr.
Bul 1,8 mlrd AQSh dollary kólemindegi ınvestıtsııa. Onyń aıasynda jylyna 3 mıllıon tonnaǵa deıin astyq óńdeıtin zaýyt salý josparlanǵan, — delingen habarlamada
Mańyzdysy, bul jerde túpkilikti suranysqa ıe bolatyn taýarlar natrıı glýtamaty, krahmal jáne mıneraldy tyńaıtqyshtar óndiriletin bolady.
Sondaı-aq klınker ónimderi men qaptama kirpish shyǵaratyn jáne pestıtsıd pen tyńaıtqyshtar óndiretin zaýyttardyń qurylysy josparlanǵan.
Qazan aıynda astyqty tereń óńdeýdiń ekinshi iri keshenin salý jónindegi strategııalyq negizdemelik kelisimge qol qoıyldy. Investıtsııa kólemi – 1,5 mlrd AQSh
dollardy qurap, onda 1000 jumys orny ashylady.
Sondaı-aq, bıyl mańyzdy kelissózder júrgizildi. Іri ınvestorlar bıdaı óńdeý men jem óndirý, elevator men qurama jem zaýytyn sondaı-aq asyl tuqymdy reprodýktor salý boıynsha jobalardy júzege asyrýdy josparlap otyr.
Jobalardyń iske asyrylýy – 700-ge deıin jumys ornyn qura otyryp, shamamen 600 mln. AQSh dollary kólemindegi ınvestıtsııa tartýǵa múmkindik beredi.
Osy jyly «BENT» kompanııalar toby «QAZShPAL» kásipornyn satyp aldy.
Olar táýligine 3 myńnan astam shpal shyǵarý arqyly óndiristi qaıta jańǵyrtýǵa keminde 10 mlrd teńge ınvestıtsııa quıady.
Álemdik iri taý-ken baıytý kompanııasy «Zı-djın Maınıng» dúnıe júziniń 18 elinde jumys isteıdi. Aldyńǵy qatarly halyqaralyq standarttar men qazirgi zamanǵy tehnologııalardy engizýde.
Kompanııa «Raıgorodok» ken ornyn satyp aldy jáne jańa altyn óndiretin fabrıkanyń qurylysyna 500 mln. AQSh dollaryn ınvestıtsııalaýdy josparlaýda. 1000 jumys orny ashylady.