Aqmola oblysy Jibek Joly aýylynyń turǵyndary tabıǵı gazǵa qol jetkizdi
ASTANA. KAZINFORM – Aqmola oblysynda halyqtyń ómir súrý sapasyn jaqsartýǵa jáne óńir ekonomıkasyn qoldaýǵa baǵyttalǵan mańyzdy ınfraqurylymdyq jobalardy iske asyrý jalǵasyp jatyr. Memleket basshysynyń eldi mekenderdi gazdandyrý jónindegi Joldaýyn oryndaý aıasynda Arshaly aýdany Jibek Joly aýylynyń turǵyndary tabıǵı gazǵa qol jetkizdi.
Іri eldi mekendi gazdandyrý osy jyldyń sońyna deıin 2 000-nan astam aýlany gazben jabdyqtaý júıesine qosýǵa múmkindik beredi, al jalpy qamtý 6 000-ǵa jýyq úı ıesin quraıdy. Jibek Joly aýylyndaǵy gaz qubyrynyń uzyndyǵy – shamamen 250 shaqyrym.
Saltanatty iske qosý rásimi oblys ákimi Marat Ahmetjanovtyń, «QazaqGaz»UK AQ Basqarma tóraǵasy Sanjar Jarkeshovtiń jáne Májilis depýtattarynyń qatysýymen ótti.
«Prezıdent Qasym-Jomart Toqaev aldymyzǵa qoıǵan basty mindet – halyqtyń ómir súrý deńgeıin arttyrý. Búginde aýyl turǵyndaryn tabıǵı gazben qamtamasyz ettik. Bul – bizdiń jumysymyzdyń mańyzdy baǵyttarynyń biri. Osy jyly óńirde 125 myń adamdy qamtı otyryp, eldi mekenderdi gazdandyrý boıynsha 12 joba iske asyrylýda», - dep atap ótti oblys ákimi.
Óz kezeginde Sanjar Jarkeshov ár óńirde ómir súrý sapasy artyp jatqanyn tilge tıek etti.
«Gazǵa qosylý – bul turǵyndar úshin turmystyq jaǵdaıdy jaqsartý ǵana emes, eldi mekenderdi ornyqty damytýǵa jasalǵan mańyzdy qadam. QazaqGaz ulttyq kompanııasy únemi energetıkalyq qaýipsizdikti qamtamasyz etý jáne elimizdiń ár óńirinde ómir súrý sapasyn arttyrý úshin jumys isteıdi», - dep atap ótti Sanjar Jarkeshov.
Alǵashqy qosylǵan abonentterdiń biri Orazovtar otbasy boldy.
«Bul bizdiń otbasymyz úshin óte qýanyshty jáne kópten kútken oqıǵa. Bizdiń 5 nemeremiz bizben birge turady jáne biz olardyń ómirin jaıly etýge tyrysamyz», - dep atap ótti otaǵasy Esirkepbaı Orazov.
Budan basqa, Arshaly aýdanynda azamattardyń áleýmettik osal sanattaryna gaz jabdyqtaryn qosý jáne ornatý shyǵyndaryn óteý úshin birjolǵy áleýmettik kómek kózdelgen. Kómek mólsheri naqty shyǵyndarǵa baılanysty 100 AEK (369 200 teńge) deıingi somany quraıdy. Arshaly aýdanynyń aýmaǵynda tirkelgen jáne turaqty turatyn turǵyn úı ıeleri bul qarajatty ala alady.
Azamattarǵa yńǵaıly bolýy úshin aýyl ákimdiginde servıstik ortalyq ashyldy, onda turǵyndar gaz qosýǵa, turǵyn úıdi rásimdeýge jáne áleýmettik kómek alýǵa qajetti barlyq kómek túrin ala alady. Oǵan qosa munda halyq sany týraly derekterdi ózektendirý jáne gazdandyrý shyǵyndaryn naqty esepteý úshin tirkeý sharalary júrgiziledi.
Aıta keteıik, 2022 jyly oblysta magıstraldik gaz qubyry trassasynyń boıynda ornalasqan 16 eldi meken gazdandyryldy. Jobany iske asyrýǵa 8,9 mıllıard teńge bólindi. Aldaǵy ýaqytta Tselınograd aýdanyn da gazdandyrý josparlanýda.
