Aqmola oblysy Zerendi aýdanynyń ákimi saılandy
ASTANA. KAZINFORM – Áset Qurmanǵojın Aqmola oblysy Zerendi aýdanynyń ákimi bolyp taǵaıyndaldy, dep habarlaıdy Kazinform tilshisi.
2025 jylǵy 15 maýsymda Aqmola oblysy Zerendi aýdany ákiminiń saılaýy ótti. Ákim laýazymyna birden úsh úmitker baq synady.
— Zerendi aýdandyq saılaý komıssııasy «Qazaqstan Respýblıkasyndaǵy saılaý týraly» Konstıtýtsııalyq zańynyń 14-babynyń 9-tarmaǵy, 44-babynyń 2-tarmaǵy, 45-baby, 113-10 babyna sáıkes Aqmola oblysy Zerendi aýdanynyń ákimin saılaý qorytyndylary týraly ýchaskelik saılaý komıssııalarynyń hattamalaryn negizge ala otyryp, saılaý qorytyndylaryn belgiledi. Saılaý okrýgi boıynsha saılaýshylar tizimine 21 434 azamat engizilgen, onyń 11 553-i daýys berdi. Jaramsyz dep tanylǵan bıýlletender sany — 303, «Barlyǵyna qarsy» belgisimen — 581. Árbir kandıdat úshin berilgen daýys sany: Baıseıitov S. Sh. — 2 148; Esimbaev A.A. — 945; Qurmanǵojın Á.A. — 7576, — dep jarııalady Zerendi aýdandyq saılaý komıssııasy saılaýdyń qorytyndysyn.
Osylaısha, Aqmola oblysy Zerendi aýdanynyń ákimi bolyp buǵan deıin Aqmola oblysynyń ekonomıka jáne bıýdjettik josparlaý basqarmasy basshysynyń orynbasary qyzmetin atqarǵan 1988 jyly týǵan Áset Qurmanǵojın saılandy.
Saılaýaldy baǵdarlamasynan belgili bolǵandaı, Áset Qurmanǵojın kólik jáne kommýnıkatsııa kolledjinde jáne Qazaq temir jol kóligi ýnıversıtetinde «temir jol kóligindegi ekonomıkalyq qyzmet» mamandyǵy boıynsha joǵary bilim alǵan.
17 jyldan astam ýaqyt Aqmola oblysynyń jergilikti atqarýshy organdarynda, statıstıka organdarynda, qazynashylyq organdarynda, Zerendi aýdany ákiminiń apparatynda qyzmet etti. 2022 jyly Zerendi aýdany ákiminiń orynbasary bolyp taǵaıyndaldy. 2024 jyldan bastap saılaýǵa deıin Aqmola oblysynyń ekonomıka jáne bıýdjettik josparlaý basqarmasy basshysynyń orynbasary laýazymyn atqarǵan.
Buǵan deıin Shymkent qalasyndaǵy Ál-Farabı aýdanyna jańa ákim taǵaıyndalǵanyn habarlaǵan bolatynbyz.