Aqmola oblysy úsh óńirdiń memlekettik aýdıtorlaryn aýqymdy spartakıadada biriktirdi
KÓKShETAÝ. KAZINFORM – Búgin Kókshetaýdaǵy «Kókshe-Arena» bazasynda memlekettik aýdıtorlar arasyndaǵy respýblıkalyq spartakıadanyń soltústik aımaqtyq kezeńi bastaldy. Qalanyń sport alańdary Aqmola, Qostanaı jáne Soltústik Qazaqstan oblystarynyń qurama komandalaryn biriktirdi. Aýqymdy týrnır eki mereıtoıǵa – memlekettik qarjylyq baqylaý organdarynyń 30 jyldyǵyna jáne tekserý komıssııalarynyń qurylǵanyna 15 jyl tolýyna oraı uıymdastyryldy.
Іs-sharanyń saltanatty ashylýyna Aqmola oblysy ákiminiń birinshi orynbasary Eldos Ramazanov qatysty. Ol mamandardy quttyqtap, mamandyqtyń damýyna qosqan úlesteri úshin alǵys bildirdi.
– Úsh onjyldyq ishinde memlekettik aýdıt ınstıtýty bıýdjet qarajatyn tıimdi paıdalanýdyń senimdi kepiline aınaldy. Jumystaryńyzdyń jaýapkershiligine qaramastan, sportqa ýaqyt tabatyndaryńyz qýantady. Bul – komandalyq rýhty nyǵaıtýdyń eń tıimdi joly, - dep atap ótti Eldos Ramazanov.
«Kókshe-Arenadaǵy» merekelik atmosferany kontserttik baǵdarlama tolyqtyrdy. Odan keıin komandalar birden jarystarǵa kiristi. Qatysýshylar úshin bul týrnır tek sporttyq saıys qana emes, tájirıbe almasýǵa arnalǵan mańyzdy alańǵa da aınaldy.
– Bul múmkindik bizge kórshiles óńirlerdegi áriptestermen jaqynyraq tanysýǵa, jumys barysyn beıresmı jaǵdaıda talqylaýǵa jáne sport arqyly jaqyndasýǵa jol ashady. Jarysqa shamamen bir jarym aı daıyndaldyq, komandanyń maqsaty – tek jeńis, - dedi spartakıada qatysýshysy Murat Rahymjanov.
Uıymdastyrýshylardyń aıtýynsha, memlekettik qyzmetshiler arasynda mundaı deńgeıdegi jarysty ótkizý erekshe úılestirýdi talap etedi.
– Osyndaı formattaǵy shara oblysymyzda alǵash ret ótkizilip otyr. Qatysýshylarǵa sátti oıyn jáne eń bastysy – jaraqatsyz óner kórsetýdi tileımin. Ádil básekede myqty jeńiske jetsin, - dedi buqaralyq ulttyq sport túrlerin damytý ınfraqurylymy bóliminiń bas mamany Nursultan Tasybaev.
Búgingi kún voleıbol matchtary men shahmat partııalaryna arnaldy. Al shaǵyn fýtbol men ústel tennısinen sheshýshi kezdesýler erteń, 15 mamyr kúni ótedi.
Aımaqtyq kezeńniń jeńimpazdary respýblıkalyq spartakıadanyń fınalynda Soltústik óńirdiń namysyn qorǵaıdy.
