Aqmola oblysy Qaraótkel aýylynyń turǵyndary tabıǵı gazǵa merziminen buryn qol jetkizdi
AQMOLA OBLYSY. KAZINFORM – Gazdandyrý elorda aglomeratsııasyn damytý boıynsha aýqymdy jobanyń bóligi, dep habarlaıdy Kazinform tilshisi.
Aqmola oblysy ákimdigi baspasóz qyzmetiniń habarlaýynsha, Táýelsizdik kúni qarsańynda aımaqta mańyzdy oqıǵa boldy: Tselınograd aýdanyndaǵy Qaraótkel aýyly turǵyndarynyń úılerine alǵash ret tabıǵı gaz keldi. Aýyl turǵyndary úshin bul jaı ǵana turmystyq jaılylyq emes, olardyń ómir súrý sapasyn jaqsartý jolyndaǵy mańyzdy qadam. Bul oblystyq ákimdik, «QazaqGaz» UK» AQ jáne onyń enshiles kompanııasy «QazaqGaz Aimaq» AQ-nyń úılestirilgen kúsh-jigeriniń arqasynda múmkin boldy.
Gaz kompanııasynyń málimetinshe, jeli qurylysy ótken jyly bastalyp, merziminen buryn aıaqtaldy. Bastapqyda paıdalanýǵa berý 2027 jylǵa josparlanǵan bolatyn. Biraq jumystyń jedeldetilýi jáne qubyr jelisiniń ýaqytyly salynýynyń arqasynda kógildir otyndy berý osy jyldyń jeltoqsan aıynda júzege asty.
- Qaraótkeldiń tabıǵı gazǵa qosylýy – búkil aýdan úshin mańyzdy oqıǵa. Joba aıasynda 63 shaqyrymdyq taratý jelilerin salynyp, 15 gaz taratý pýnktin ornatylǵan. Bul shamamen 5 myń turǵyndy gazben qamtamasyz etýge múmkindik berip otyr, - dep atap ótti oblys ákiminiń birinshi orynbasary Eldos Ramazanov.
Aýyldaǵy ártúrli qysymdaǵy gaz qubyrlarynyń jalpy uzyndyǵy 100 shaqyrymǵa jetti. Alǵashqy úsh iske qosý kesheni 4110 úı sharýashylyǵynyń shamamen 2460-yn tabıǵı gazben qamtamasyz etedi. Zamanaýı gaz taratý pýnktteri turaqty jáne qaýipsiz gazben jabdyqtaýdy qamtamasyz etedi, bul soltústik klımat jaǵdaıynda óte mańyzdy.
- Biz bul protsesti aıtarlyqtaı jedeldete aldyq. Bul bizge Qaraótkel turǵyndaryn tabıǵı gazben merziminen buryn qamtamasyz etýge múmkindik berdi. Gazdandyrý jaılylyqty jaqsartyp qana qoımaı, sonymen qatar halyq úshin aıtarlyqtaı únemdeýge múmkindik beredi. Bul rette qaýipsizdik bizdiń basty basymdyǵymyz bolyp qala beredi, - dep atap ótti «QazaqGaz Aimaq» AQ Astana óndiristik fılıalynyń dırektory Ýálıhan Qymbatov.
Aýyl turǵyndarynyń ózderi muny kópten kútken jáne shynymen de tarıhı sát dep atady.
- Buryn qysta peshti táýlik boıy jaǵýǵa týra keletin. Qazir ómir áldeqaıda jeńildedi. Aýylymyzǵa gaz jetkizýge kómektesken barshańyzǵa úlken alǵys aıtamyz, - dep bólisti Qaraótkel turǵyny Ruqııa Ajarbaıqyzy.
Qaraótkeldi gazdandyrý – Aqmola oblysyndaǵy eldi mekenderdi tabıǵı gazben qamtamasyz etýdiń keshendi baǵdarlamasynyń bóligi. Bıyl ǵana tabıǵı gaz Nurly, Shubar, Aqqaıyń, Talapker, Ybyraı Altynsarın jáne Qoıandy aýyldaryna, sondaı-aq Qosshy qalasyna jetti. Osy jobalardyń arqasynda qazir 42 myńnan astam adam ekologııalyq taza jáne zamanaýı otynǵa qol jetkizdi.
Sondaı-aq 2026 jyly shamamen 114 myń adam turatyn taǵy jeti eldi mekendi gazben jabdyqtaý josparlanyp otyr. Taǵy segiz aýyldy gazdandyrýdyń jobalaý-smetalyq qujattamasy da ázirlený ústinde.
Aıta keteıik, buǵan deıin Aqmola oblysynyń Qoıandy aýylynda Prezıdenttiń Astana aglomeratsııasyn damytý jónindegi tapsyrmasy aıasynda tabıǵı gaz berý bastalǵanyn jazǵan edik.
Jobany QazaqGaz ulttyq kompanııasy men onyń enshiles kásiporny «QazaqGaz Aimaq» AQ, Aqmola oblysy ákimdigi jáne QR Energetıka mınıstrligimen birlesip júzege asyrǵan edi.
Jańa gaz rettegishteri bes myń úıdi turaqty gazben qamtamasyz etedi. Qoıandyǵa gaz kelýi halyqtyń ómir súrý sapasyn jaqsartyp, kásipkerliktiń damýyna yqpal etedi jáne ekologııaǵa oń áserin tıgizedi.
