Aqmola oblysy elimizde astyq jınaý boıynsha kóshbasshy atandy

ASTANA.KAZINFORM - Bıylǵy oraq naýqany sońǵy jyldardaǵy eń nátıjeli naýqandardyń biri bolyp, Aqmola oblysyn astyqtyń jalpy jınalymy boıynsha elimizdiń kóshbasshylary qataryna shyǵardy, dep habarlaıdy Úkimettiń resmı saıty.

Ortasha ónimdilik 16,3 ts/ga bolyp, oblysta 7,6 mln tonnadan astam astyq bastyryldy. Jınalǵan astyqtyń 70%-dan astamy úshinshi sanat talaptaryna saı keledi, bul óńirdiń dástúrli jáne jańa eksporttyq baǵyttardaǵy pozıtsııasyn kúsheıtedi.

Qazaqstandyq selektsııadaǵy «Aqmola-2», «Astana-2» jáne «Aına» tuqymdary qoldanylǵan sharýashylyqtarda ortasha ónimdilik gektaryna 30 tsentnerden asty, al «Maksımovskoe» JShS-de 41,2 ts/ga-ǵa jetti. Joǵary kórsetkishterge mıneraldy tyńaıtqyshtardy, elıtalyq tuqymdardy jáne ósimdikti qorǵaý quraldaryn keńinen qoldaný esebinen qol jetkizildi.

Aqmola oblysy egis alqaptaryn ártaraptandyrý boıynsha da kóshbasshylar qatarynda. Bıyl maıly daqyldar alqaby alǵash ret 500 myń gektarǵa jetti – bul ótken jylmen salystyrǵanda 2,5 ese kóp.

Budan bólek, jyl basynan beri oblysta 1 trln teńgeniń aýyl sharýashylyǵy ónimi óndirildi. Jyl qorytyndysy boıynsha óndiris kólemi 1,2 trln teńge deńgeıinde bolady dep kútilip otyr.

Óńirde aýyl sharýashylyǵy ónimderiniń tereń óńdeý úlesin arttyrý maqsatynda halyqaralyq qatysýmen birqatar iri jobalar júzege asyrylyp jatyr. Solardyń biri – álemdik Dalian Hesheng Holdings holdıngi tarapynan júzege asyrylatyn astyqty tereń óńdeý zaýytynyń qurylysy. Sheteldik ınvestıtsııalar kólemi $1,8 mlrd, óńdeý qýaty jylyna 3 mln tonnaǵa deıin jetedi. Jobany 2028 jyly iske qosý josparlanyp otyr.

Bıylǵy qazan aıynda Shortandy aýdanynda Hopefull Grain kompanııasynyń taǵy bir astyqty tereń óńdeý keshenin salý jóninde strategııalyq kelisimge qol qoıyldy. Investıtsııa kólemi – $1,5 mlrd.

Esil aýdanynda bıdaıdy óńdeý jáne jem óndirý zaýyttaryn, sondaı-aq elevator men qurama jem zaýytyn salý josparlanyp otyr.

Osyǵan deıin elden 3,1 mln tonna astyq eksporttalǵany týraly jazdyq.