Aqmola oblysy aýdandyq bilim bólimi memlekettik satyp alýdaǵy zań buzýshylyq úshin 1 mln teńge aıyppul arqalady
ASTANA. KAZINFORM – Aqmola prokýrorlary memlekettik satyp alý salasyndaǵy buzýshylyqtardy anyqtady. Bul týraly oblysy prokýratýra málim etti.
Bulandy aýdanynyń prokýratýrasymen memlekettik satyp alý týraly zańnamany saqtaý máselesi boıynsha aýdandyq bilim bóliminiń qyzmetine taldaý júrgizildi.
— 2022-2024 jyldar boıy memlekettik satyp alýdy uıymdastyrý jáne ótkizý kezinde Bólim tehnıkalyq erekshelikte satyp alynatyn taýardyń jeke ónim berýshige tıesiligin aıqyndaıtyn taýar belgilerin, fırmalyq ataýlaryn, óndirýshiniń ataýlaryn zańsyz kórsetkeni anyqtaldy, — delingen prokýratýra habarlamasynda.
Atap aıtqanda, kúzet-órt dabyly júıeleriniń jabdyqtaryn, keńse tehnıkasyn, sondaı-aq qurylys materıaldaryn satyp alýǵa 11 shart anyqtaldy. Joǵaryda atalǵan zań buzýshylyqtar básekelestikti edáýir taryltady, áleýetti ónim berýshilerdiń aýqymyn shekteıdi.
Prokýratýranyń qadaǵalaý aktisi boıynsha Bólim basshylyǵy ÁQBtK-niń 207-baby 1-bóligi boıynsha ákimshilik jaýapkershilikke tartylyp, oǵan 1 mln teńge mólsherinde aıyppul salyndy (aıyppul qysqartylǵan tártippen tólendi).
Eske sala keteıik, buǵan deıin SQO-da qonys aýdarý baǵdarlamasy boıynsha bólingen qarjyny urlaý faktileri anyqtalǵanyn jazǵan bolatynbyz.