Aqmola meshitteri muqtaj jandarǵa qarjylaı kómek kórsetip turady

KÓKShETAÝ. QazAqparat - Aqmola oblysynyń meshitteri bıyl muqtaj otbasylarǵa 9 mıllıon teńgeden astam qarjylaı kómek kórsetti, dep habarlaıdy QazAqparat tilshisi.

Naýan haziret atyndaǵy Aqmola oblystyq ortalyq meshitiniń baspasóz qyzmetiniń málimeti boıynsha, bul 9 mıllıon 243 myń teńgeden astam qarjy oblystaǵy meshitterge járdem surap kelgen 648 otbasyǵa úlestirilgen. Budan bólek, Qurban aıt jáne basqa da kezderde bas-aıaǵy 4 myńnan astam otbasyǵa 25 tonna et taratylǵan. Al, kúz ben qys aılarynda áleýmettik jaǵdaıy tómen 63 otbasyǵa 1 mıllıon 400 myń teńgeniń otyn-kómiri satyp áperilgen. Sonymen qatar, aımaq meshitteri sońǵy jyldary respýblıkalyq «Mektepke jol» aktsııasyna da eleýli úles qosyp keledi.

«Bıylǵy jyly 800-den astam oqýshyǵa oqý quraldary salynǵan sómkeler úlestirilse, 147 balaǵa mektep formasy satyp áperildi», - deıdi Qazaqstan Musylmandary Dinı basqarmasynyń Aqmola oblysy boıynsha ókil ımamy Qýanysh Sábıt.