Aqmola men SQO-da jol qurylysy mamandary paramen ustaldy
ASTANA. KAZINFORM – «QazAvtoJol» ulttyq kompanııasy jol qurylysy nysandaryndaǵy sybaılas jemqorlyqqa qarsy baqylaýdy kúsheıtý aıasynda anyqtalǵan zań buzýshylyqtardy quqyq qorǵaý organdaryna joldady.
Kompanııanyń málimetinshe, ishki baqylaý júıesi men Sybaılas jemqorlyqqa qarsy komplaens-qyzmetiniń jumysy nátıjesinde birneshe zań buzýshylyq faktisi anyqtalǵan.
– 2026 jylǵy 8 shildede «QazAvtoJol» UK» AQ-nyń bastamashylyq habarlamasy negizinde Ulttyq qaýipsizdik komıtetiniń Soltústik Qazaqstan oblysy boıynsha departamenti merdiger uıymnyń tehnıkalyq qadaǵalaý jónindegi bas ınjenerin oryndalǵan jumystardyń aralyq aktisi somasynyń 1 paıyzy kóleminde para alý kezinde ustady, – delingen habarlamada.
Sonymen qatar kompanııa júrgizgen qyzmettik tergep-tekserý men aýdıt nátıjesinde Kókshetaý kólik prokýratýrasy «QAJservıs» JShS Aqmola oblystyq fılıalynyń laýazymdy tulǵalaryna qatysty QR Qylmystyq kodeksiniń 250-baby 1-bóligi boıynsha sotqa deıingi tergep-tekserýdi tirkegen. Aldyn ala esep boıynsha keltirilgen zalal kólemi 24 mln teńgeden asady.
– Atalǵan faktiler ishki baqylaý, aýdıt jáne sybaılas jemqorlyqqa qarsy komplaens júıesi aıasynda júrgizilgen júıeli jumystardyń nátıjesinde anyqtaldy. Kompanııa jaýapkershiliktiń bultartpastyǵy qaǵıdatyn basshylyqqa ala otyryp, quqyq qorǵaý, arnaýly jáne qadaǵalaý organdarymen ózara is-qımyldy jalǵastyrady, – dep málimdedi ulttyq kompanııa.
Sondaı-aq 2025 jylǵy shildeden bastap kúshine engen zańnamalyq ózgeristerge sáıkes tehnıkalyq jáne avtorlyq qadaǵalaý mamandary memlekettik fýnktsııalardy oryndaýǵa ýákilettik berilgen adamdarǵa teńestirilgeni atap ótildi. Osyǵan baılanysty olarǵa sybaılas jemqorlyqqa qarsy zańnamada kózdelgen barlyq shekteýler men jaýapkershilik qoldanylady.
Kompanııa jol qurylysy salasyndaǵy sybaılas jemqorlyq, qyzmettik ókilettikterdi teris paıdalaný jáne ózge de zańsyz áreketterdiń árbir faktisi quqyq buzýshynyń laýazymyna nemese mártebesine qaramastan quzyretti organdarǵa joldanatynyn eskertti.
Aıta keteıik, Qazaqstanda bir aıda 125 sybaılas jemqorlyq deregi tirkeldi.
