Aqmola men Kanada arasynda saýda aınalymy 9 mln dollarǵa jetti
KÓKShETAÝ. QazAqparat - Bıylǵy jyldyń segiz aıynda Aqmola oblysy men Kanada arasynda saýda aınalymy 9 mıllıon AQSh dollaryn qurady. Bul týraly Aqmola oblysy ákiminiń orynbasary Egor Kappel men Kazaqstan Respýblıkasyndaǵy Kanada elshiliginiń hatshysy Darren Smıt kezdesýinde aıtyldy, dep habarlaıdy QazAqparat tilshisi.
Kezdesýde eki jaqty yntymaqtastyq jáne ekonomıkalyq baılanystardy odan ári damytý múmkindikteri qarastyryldy.
Aqmola oblysy men Kanada arasynda yntymaqtastyq sonaý 2004 jyldan bastaý alady. Ótken jyldyń qorytyndysy boıynsha eki jaqty saýda aınalymy 12 mln dollaryn quraǵan. Osy oraıda, taýar aınalymy negizinen, ımporttyq taýarlardyń úlesine tıesili. Olardyń ishinde aýyl sharýashylyǵy tehnıkalary men qosalqy bólshekter, qurylys materıaldary bar. Sonyń ishinde ımport úlesi aǵymdaǵy jyldyń segiz aıynda 9 mıllıon dollarǵa jetken.
Kezdesý barysynda eki el arasyndaǵy agroónerkásiptik sektor men saýda-ekonomıkalyq múmkindikter keńinen sóz boldy. Oblys ákiminiń orynbasary óz sózinde óńirimizde agrarly sala joǵary qarqynmen damyp kele jatqanyn atap ótti.
«Elimizde óndiriletin astyqtyń tórtten biri bizdiń oblysta alynady. Mal sharýashylyǵyn damytý, et, sút ónimderin daıyndaý men eksporttaý boıynsha da úlken mindetter júktelip otyr. Ásirese, Astana qalasynyń aınalasynda azyq-túlik beldeýin jasaý baǵytynda biraz jumystar atqarylyp jatyr. Sonymen qatar, óńirde ónerkásip salasy da jaqsy damyp keledi. Sońǵy jyldary oblysymyzǵa Kanadadan aýyl sharýashylyǵy tehnıkasy men iri qara mal kóptep jetkizildi. Muny eki jaqtyń saýda-sattyq salasyndaǵy jetistikteri dep bilemiz», dedi Egor Kappel óz sózinde.
Sondaı-aq, kanadalyq meıman óz sózinde Aqmola óńirine kelgenine óte qýanyshty ekenin aıta kelip, jumys saparynyń maqsatyna toqtaldy.
«Kanada Qazaqstannyń aýyl sharýashylyǵy salasyndaǵy basty bir áriptesi bolyp tabylady. Osy óńirde de birqatar kanadalyq kompanııalardyń ókilderi bar. Olar eki jaqty saýda-sattyqty damyta túsýde. Bizdiń jumys saparymyzdyń maqsaty da osy yntymaqtastyq jáne ekonomıkalyq baılanysty odan ári nyǵaıtý», dedi bul oraıda, Darren Smıt óz sózinde.
Kezdesýdi qorytyndylaǵan E.Kappel aldaǵy ýaqytta eki el arasyndaǵy qarym-qatynas tap osylaı órbıtinine senim bildirdi.
