Aqmola mektepteriniń 86,3 paıyzynda ǵana ystyq tamaq uıymdastyrylǵan

Kókshetaý qalasyndaǵy Nazarbaev zııatkerlik mektebinde «Nur Otan» partııasy Aqmola oblystyq fılıalynyń «Bilim» baǵyty boıynsha partııa kýratory óńirlik komıssııasynyń kezekti otyrysy ótti.

Jıynda jalpy bilim beretin mektepterde oqýshylarǵa ystyq tamaq berýdi uıymdastyrý máseleleri talqylandy.

Oblystyq bilim basqarmasy basshysynyń orynbasary Valerıı Gamazovtyń aıtýynsha, 2018-2019 oqý jylynda oblys boıynsha barlyǵy 560 jalpy bilim berý mekemesi tirkelgen. Onyń 555-i jergilikti atqarýshy organdardyń basqarýynda bolsa, beseýi oblystyq mektep ınternat.

«Qazirgi tańda 555 mekteptiń 479-ynda nemese 86,3 paıyzynda ystyq tamaq uıymdastyrylǵan. Atbasar, Esil, Egindikól, Jaqsy, Jarqaıyń aýdandary men Kókshetaý jáne Stepnogorsk qalalaryndaǵy jalpy bilim berý mekemelerindegi oqýshylar tolyq ystyq tamaqpen qamtamasyz etilgen. Oqýshylardy ystyq tamaqpen qamtamasyz etý deni saý urpaq tárbıeleýde asa mańyzdy másele bolyp otyrǵanymen, keıbir aýdandarda bul jumystar áli de kóńil kónshitpeıdi», - deıdi Valerıı Gamazov.

Basqarma basshysy orynbasarynyń sózine sensek, Astrahan, Aqkól, Bulandy, Býrabaı jáne Zerendi aýdandarynda jergilikti atqarýshy bılik az qamtamasyz etilgen otbasynyń balalaryn ǵana tolyq ystyq tamaqpen qamtamasyz etip otyr. Al, jalpy kórsetkish bul aýdandarda kóńilden shyqpaıdy. Tipti, Astrahan aýdanyndaǵy Tolqynkól aýylyndaǵy negizgi mektepte oqıtyn 13 oqýshynyń ystyq tamaqpen qamtylmaǵany anyqtalyp otyr.

Otyrysta «Nur Otan» partııasy Aqmola oblystyq fılıaly tóraǵasynyń birinshi orynbasary Ǵalym Bekmaǵambetov bul kemshilikterdiń naqty sebepterin anyqtap, ony sheshý joldaryn birlesip qarastyrý qajettigin atap ótti.

Sonymen qatar, jıynda ystyq tamaqqa qoıylatyn sanıtarlyq-epıdemıologııalyq talaptar, osyǵan qatysty normatıvtik qujattar jáne oqýshylardyń nárli taǵamdarmen tamaqtaný máselelerine de nazar aýdaryldy.