Salyq reformasyna qatysty Aqmola kásipkerleri Úkimetke usynystaryn aıtty
ASTANA. KAZINFORM — Qarjy vıtse-mınıstri Dáýren Temirbekov Óńirlik kásipkerler palatasynyń alańynda Aqmola oblysynyń bıznes-qoǵamdastyq ókilderimen kezdesti. Jıynda salyq reformalary, onyń ishinde QQS mólsherlemesin arttyrý máselesi talqylandy.
Elimizdiń prezıdenti Qasym-Jomart Toqaev bıylǵy 7 aqpanda Astanada bıznes ókilderimen ótken kezdesýde Úkimetke QQS mólsherlemesi boıynsha máseleni qosymsha pysyqtaýdy tapsyrǵan bolatyn. Osyǵan baılanysty Premer-mınıstr Oljas Bektenovtiń tapsyrmasy boıynsha Úkimet músheleri «Atameken» UKP ókilderimen birlesip jergilikti jerlerde kásipkerlik qoǵamdastyqpen salyq saıasaty máselelerin talqylaý maqsatynda óńirlerge bardy.
Dáýren Temirbekov QQS saralanǵan mólsherlemeleri boıynsha Úkimettiń usynystaryn jetkizdi. Qosylǵan qun salyǵynyń jalpy mólsherlemesin 16% deńgeıinde belgileý usynylýda, al aýyl sharýashylyǵy ónimderin óndirýshilerdi salyqtan tolyǵymen bosatý josparlanyp otyr. Birqatar sala úshin 10% aralyq mólsherleme engiziledi. Osylaısha, Úkimet usynǵan QQS mólsherlemesin saralaý: 16%, 10%, 0%, salyqtan bosatýdy qamtıdy.
— QQS ósimi úı mańyndaǵy dúkenderge, meıramhanalarǵa, sulýlyq salondaryna jáne basqa da bólshek saýda oryndaryna áser etpeıdi, - dep túsindirdi QR UEM salyq jáne keden saıasaty departamentiniń dırektory Erlan Saǵynaev.
Kezdesý barysynda salalyq qaýymdastyq ókilderi salyq zańnamasyna usynylatyn ózgeristerge qatysty pikirin bildirdi.
— Salyqty kóterýden basqa, bıýdjet shyǵystarynyń qurylymyn synı turǵydan qaıta qaraý mańyzdy. Ótken jyly engizilgen qatań bıýdjettik erejelerdiń saqtalýyna baqylaýdy kúsheıtý qajet, el ekonomıkasynyń ishinde rezervterdi izdeý qajet. Eńbekaqy tóleý qoryna salyq júktemesiniń 10%-ǵa tómendeýi QQS mólsherlemesin kóterý esebinen ótemaqymen qatar júrmeýi tıis, ol derbes salyq reformasy bolýy kerek, - dep esepteıdi Aqmola oblysy Týrıstik qaýymdastyǵynyń basshysy, týrızm jáne ekologııa salalyq keńesiniń tóraǵasy Qaırat Sultanov.
Shaǵyn bıznes sýbektileri atynan «S. A. Ahmadıev» JK basshysy Sádibek Ahmadıev sóz sóılep, tirkeý kezinde QQS-ty 50 myń AEK-ke deıin ulǵaıtýdy qarastyrýdy usyndy.
Aqmola oblysy Kásipkerler palatasynyń dırektory Erqanat Musylmanbek qosylǵan qun salyǵynda mólshelme men shekti tirkeý máselesi aqylǵa qonymdy túrde qabyldanýy tıis ekenin aıtty.
— Aqmola bıznes-qoǵamdastyǵynyń pikiri eskeriledi dep úmittenemiz, biz áriptesterimizdiń barlyq usynysyn UKP Ortalyq apparaty arqyly qarjy mınıstrligine jazbasha túrde joldaımyz. QQS mólsherlemesi men shekti tirkeý máselesi bilikti sarapshylardyń, kásipkerler men depýtattardyń pikirin eskere otyryp, aqylǵa qonymdy túrde qabyldanýy kerek, - dep tolyqtyrdy ol.
Óz kezeginde vıtse-mınıstr Dáýren Temirbekov kelip túsken barlyq usynys muqııat qaralyp, taldanyp, ári qaraıǵy jumysta eskeriletinin atap ótti.