Aqmola halqynyń 99 paıyzy densaýlyq salasyndaǵy elektrondy qujatpen qamtylǵan
KÓKShETAÝ. QazAqparat - Aqmola oblysy halqynyń 99 paıyzy densaýlyq salasyndaǵy elektrondy qujatpen qamtylǵan. Bul týraly aımaq basshysy Málik Myrzalınniń tóraǵalyǵymen ótken ákimdik otyrysynda aıtyldy, dep habarlaıdy QazAqparat tilshisi óńir basshysynyń baspasóz qyzmetine silteme jasap.
Otyrysta bıylǵy kóktemgi dala jumystaryn ótkizýdiń qorytyndysy jáne densaýlyq saqtaý salasyn tsıfrlandyrý máseleleri qaraldy.
Aqmola oblysy boıynsha densaýlyq saqtaý basqarmasynyń basshysy Sáýle Qısyqova óńirdegi medıtsınalyq mekemelerdiń 97 paıyzy medıtsınalyq aqparattyq júıemen qamtylǵanyn atap ótti. Osy júıe arqyly naýqastar 1,1 mıllıon ret óńirdegi medıtsınalyq mekemelerge júgingen. Qazirgi kezde 755 690 densaýlyq elektrondy qujaty (99 paıyzy) qamtylǵan.
DamuMed mobıldi qosymsha arqyly 13 431 belsendi aqmolalyq ınternettiń kómegimen dárigerdiń qabyldaýyna jazylǵan nemese dáriger shaqyrtqan.
Jyl sońyna deıin oblystaǵy medıtsınalyq mekemelerdiń barlyǵy ınternetke qosylsa, qyrkúıek aıyna deıin tolyqtaı elektrondy formatta qujat almasýǵa kóshetin bolady.
Bıylǵy kóktemgi dala jumystaryn ótkizýdiń qorytyndysy boıynsha oblystyq aýyl sharýashylyǵy basqarmasynyń basshysy Azamat Saǵynbaev habarlama jasady. «Aýa raıynyń jaýyndy-shashyndy bolǵandyǵyna qaramastan egis jumystary oıdaǵydaı júrgizildi»,- dedi ol óz sózinde. «Bıyl 4743,8 myń gektar alqapqa jazdyq bıdaı, sonyń ishinde 4314,4 myń gektarǵa dándi jáne dándi burshaq daqyldaryn sebý josparlansa, sol egis kóleminiń barlyǵyna da tuqym óz ýaǵynda sebildi. 258,4 myń gektarǵa maıly daqyldar sebý jospary da tolyq oryndaldy».
Basqarma basshysy naýqannyń ýaqtyly júrgizilýine sharýalardyń shıraq qımyly men janar-jaǵarmaı jáne aýyl sharýashylyǵy tehnıkalary daıyndyǵynyń arqasynda qol jetkizilgenin atap ótti. Endigi kezekte sharýalar topyraqtyń qunarlylyǵy men aýyl sharýashylyǵy daqyldarynyń ónimin arttyrýda mıneraldy tyńaıtqyshtardy qoldaný, aramshópter jáne ósimdik zııankesterimen kúreske daıyndyqty osy bastan qolǵa almaq. Oǵan qosa, mal azyǵyn ázirleý úshin mashına-traktor parki de jańara túspek.
Aıta ketý kerek, 2018 jyly memleket tarapynan oblystaǵy agroónerkásip kesheni salasyn damytý úshin sýbsıdııa retinde 30 mıllıard teńge qarjy bóledi.
