Aqmola fermerlerine zamanaýı veterınarlyq tehnologııa qoljetimdi bolady
Bul joly ekinshi veterınarlyq oqytý jáne qyzmet kórsetý ortalyǵy Aqkól aýdanynyń «Eńbek» JShS bazasynda ashylyp otyr. Jobany óńirlik kásipkerlik palatasy men Aqmola oblysy sút óndirýshileri qaýymdastyǵy birlesip júzege asyrýda.
«Statıstıkalyq derekterge súıensek, Qazaqstanda orta eseppen 4105 keli sút saýylady eken. Degenmen, respýblıkada joǵary kórsetkishterge qol jetkizip otyrǵan kompanııalar barshylyq. Mundaılar sanaýly ǵana. Kásipkerler palatasynyń sarapshylary bul problemany zertteı kele, ónimdilikti arttyrýdyń basty tetigi - júıelilik pen durys agroquzyrettilik ekenine kóz jetkizip otyr», - dep aıtty vedomstvodan.
Bul máseleni sheshý úshin óńirlik kásipkerler palatasynyń bastamasymen bıylǵy sáýir aıynda Ýkraınanyń «Dairy Global Experts» kompanııasy sarapshy mamandaryn tartý arqyly Zerendi aýdanynyń «Jaqsylyq agro» JShS bazasynda alǵashqy veterınarlyq oqytý jáne qyzmet kórsetý ortalyǵy ashylǵan bolatyn.
Mundaǵy maqsat – eýrpalyq deńgeıde biryńǵaı veterınarlyq qyzmet kórsetý jáne sý óndirisi salasynda ınnovatsııalyq tehnologııany engizý. Ortalyqqa Zerendi aýdanyndaǵy jalpy 2 myńnan astam iri qarasy bar 5 taýarly-sút fermasy enip otyr.
«Veterınarlyq oqytý jáne qyzmet kórsetý ortalyǵy ashylǵan úsh aıdyń ishinde fermalarda kúndelikti jumysqa beıimdelgen, veterınalyq jumystardyń qajetti tsıkly engizildi. Qolǵa alynǵan sharalar qazirgi zamańǵy dıagnostıkalyq apparat arqyly janýarlardyń aýrýyn anyqtaýǵa jáne emdeýge múmkindik berdi. Aptalyq júıede jumystyń tehnologııalyq kartasy ázirlendi, janýarlardy azyqtandyrýynyń tolyq ratsıony jasaldy. Fermalardyń olqy tustaryn anyqtaıtyn aýdıt júrgizildi. Veterınarlyq oqytý jáne qyzmet kórsetý ortalyǵy jumysynyń basty maqsaty – kásiporyndardyń ónimdiligin arttyrý», - deıdi óńirlik kásipkerler palatasynyń dırektory Tımýr Naqypbekov.
Kóptegen fermerlerdiń veterınarlyq qyzmetke qoljetimdiligi máselesi áli kúnge sheıin ashyq kúıinde qalýda. Sol sebepti, Aqkól aýdanynyń «Eńbek» JShS bazasynda veterınarlyq oqytý jáne qyzmet kórsetý ortalyǵyn ashý qolǵa alyndy. Ortalyqtyń ashylýy jaqyn mańdaǵy sút óndirisimen aınalysatyn fermerlerge qazirgi zamanǵy veterınarlyq qyzmetke qol jetkizýge múmkindik bermek.
«Keleshekte fermerler agroquzyrettiligin arttyrý jáne veterınarlyq qyzmettiń barlyq túrin alý úshin veterınarlyq oqytý jáne qyzmet kórsetý ortalyǵyn oblystyń ózge aýdandarynda da ashý josparda bar», - dep tolyqtyrdy óńirlik kásipkerler palatasynyń baspasóz hatshysy.
