Aqmola dıvızııasynyń Jaýyngerlik Týy týǵan jerge qaıtarylady
ASTANA. 14 qarasha. QazAqparat - Búgin halyqaralyq Astana áýejaıynda Aqmola dıvızııasynyń Jaýyngerlik Týyn qazaq jerine qaıtarý is-sharasy ótedi. Bul jaıynda elordanyń resmı saıty habarlap otyr.
Keshe batyr-qala Volgogradta Astana qalasy resmı delegatsııasynyń «Іzdeý» toby músheleri tapqan 72-shi Gvardııalyq atqyshtar dıvızııasynyń Jaýyngerlik Týyn berý saltanaty ótti.
Volgograd qalasyna áskerı ushaqpen ushyp barǵan qazaqstandyq delegatsııa quramynda QR Parlamenti Májilisiniń depýtattary, ınternatsıonalıst-jaýyngerler, Respýblıkalyq áskerı mekteptiń kadetteri, UQK ShQ men QR QK ofıtserleri, ardagerler keńesiniń, «Nur Otan» partııasy men BAQ ókilderi boldy.
72-shi Gvardııalyq dıvızııa Qazaq KSR-iniń Aqmola qalasynda 1941 jyldyń kúzinde KSRO Halyq komıssarlary qorǵanysynyń 29 atqyshtar dıvızııasy degen atpen jasaqtaldy. Dıvızııanyń jeke quramyna Stalıngrad shaıqasynda kórsetken erligi men qaharmandyǵy úshin Gvardııalyq ataǵy berildi. Keıin olar 72-shi Gvardııalyq atqyshtar dıvızııasy bolyp qaıta ataldy.
72-shi Gvardııalyq atqyshtar dıvızııasynyń Jaýyngerlik Týyn Astana qalasyna jetkizý bul - Uly Otan soǵysy jyldary qazaqstandyqtardyń Jaýyngerlik Týdyń astynda birigip, jaýǵa qarsy aıqasqanyn bildiretin Qazaqstan tarıhyndaǵy tuńǵysh oqıǵa.
Bul Tý keleshek urpaq úshin Uly Otan soǵysy jyldaryndaǵy qazaqstandyq jaýyngerlerdiń Erligi men Qaharmandyǵynyń, óz Otanyna degen sheksiz berilgendigi men súıispenshiliginiń nyshany retinde qyzmet etetin bolady.
