Aqmola dıqandary kúzgi egin oraǵyna kiristi
KÓKShETAÝ. QazAqparat - Aqmola oblysynyń dıqandary kúzgi egin oraǵy naýqanyna kiristi, dep habarlaıdy QazAqparat tilshisi.
Oblystyq aýyl sharýashylyǵy basqarmasynyń deregi boıynsha, búgingi tańda Jarqaıyń men Tselınograd aýdandarynyń dıqandary erte pisetin egin alqabyn destege túsire bastaǵan.
Eske sala keteıik, bıylǵy jyly oblys aýmaǵynda aýyl sharýashylyǵy daqyldarynyń alqaby 4750,4 myń gektardy quraıdy. Onyń 4323,2 myń gektar alqabyna dándi jáne burshaqty daqyldar, 257,2 myń gektaryna maıly daqyldar egilgen. Sondaı-aq 18,3 myń gektar jerge - kartop, 4,3 myń gektarǵa kókónis otyrǵyzyldy.
Oblys boıynsha egistik alqaptaryn aramshópten, zııankester men aýyl sharýashylyǵy daqyldary aýrýlarynan qorǵaý tolyq qamtamasyz etildi. Bul bıylǵy jylǵy astyqtyń kólemi men sapasyna oń yqpalyn tıgizedi. Aǵymdaǵy jyly parlardy birinshi jáne ekinshi óńdeý jumysy 675,7 myń gektar alqapta júrgizildi. 424,9 myń gektar alqap úshinshi ret, onyń 58,8 myń gektary hımııalyq ádispen óńdeldi.
Aǵymdaǵy jylǵy egin oraǵynda astyq jınaıtyn 8668 kombaın, onyń ishinde qazirgi zamanǵy ónimdiligi joǵary 2658 kombaın paıdalanylady. Bul kombaındardyń bári oraq jumysyna daıyn. Qolda bar aýyl sharýashylyǵy tehnıkalary men egis alqaptaryn esepke alsaq, bir kombaın 500 gektar alqaptyń astyǵyn jınaýy tıis. Bul oblystaǵy egin oraǵy boıynsha táýlik ónimdiligin 170 myń gektarǵa jetkizip, oraq jumysyn 25 kúnde aıaqtaýǵa múmkindik beredi. Oblys boıynsha destelegishter sany 2466 quraıdy. Destelegishter, 4763 júk avtkóligi men 7674 traktor tirkemesi egin oraǵy jumysyna shyǵýǵa tolyq daıyn.
Sonymen qatar, kúzgi dala jumystaryn oıdaǵydaı ótkizý úshin qajetti 75,9 myń tonna kólemde dızel otyny, 4,7 myń tonna dızel maıy jáne 6,9 myń tonna avtokólik benzıni jetkizilýde. Búgingi tańda 50 myń tonna dızel otyny, 4,7 myń tonna dızel maıy jáne 6,9 myń tonna benzın tasymaldanyp, alyndy. Óńirdiń oraq jumystaryna 70 myń tonna kepildendirilgen dızel otyny bólindi.
Al alynǵan ónimdi saqtaý máselesine keletin bolsaq, bıyl ony 62 astyq qabyldaý kásiporny júzege asyrady. Bul elevatorlar men qoımalar 4,1 mıllıon tonna astyq saqtaı alady. Sondaı-aq aýyl sharýashylyǵy qurylymdarynda 1,9 mıllıon tonna astyq saqtaıtyn qoımalar bar. Óńirdiń astyq qabyldaý kásiporyndary men aýyl sharýashylyǵy taýarlaryn óndirýshilerinde táýligine jalpy 100 myń tonnadan astam 229 astyq keptirgish jumys istemekshi.
