Aqmola dıqandary egis alqabynyń 67 paıyzyna dán septi
KÓKShETAÝ. QazAqparat - Aqmola oblysynda tuqym sebý jumystary 67,5 paıyzǵa oryndaldy, dep habarlaıdy QazAqparat tilshisi.
Aqmola oblysy ákiminiń baspasóz qyzmetiniń málimetinshe, aımaq basshysy Ermek Marjyqpaevtyń tóraǵalyǵymen apparat keńesi ótti. Keńeste kóktemgi egis jumystarynyń qazirgi barysy týraly jáne kúnniń ysýyna baılanysty týyndaıtyn órt qaýipiniń aldyn alý sharalary aıtyldy.
Keńeste oblystyq aýyl sharýashylyǵy basqarmasy basshysynyń orynbasary Qasym Itqusov atap ótkendeı, búgingi kúnge deıin belgilengen 4,3 mıllıon gektar alqaptyń 2,9 mıllıon gektaryna dándi jáne burshaq daqyldarynyń tuqymy sebildi. Bul barlyq egis alqabynyń 67,5 paıyzy. Qazir sharýashylyq dıqandary belgilengen kúndik norma - 230 myń gektardyń ornyna, 295 myń gektar alqapqa tuqym sińirýde. Osyndaı qarqyndy jumystyń nátıjesinde ótken jyldyń sáıkes kezeńindegi kórsetkishpen salystyrǵanda bıyl 450 myń gektar jerge tuqym artyq sebilgen. Maıly daqyldar belgilengen alqaptyń 67 paıyzyna, al kartop otyrǵyzý 75 paıyzǵa jetti.
«Іri sharýashylyqtar boıynsha qıyndyqtar joq. Olarda zamanaýı mashına-traktor parki qoldanylýda, agrotehnıkalyq talaptar saqtalyp, jalpy egin egý naýqanyn tıimdi júrgizý úshin barlyq jaǵdaılar jasalǵan. Aýyl sharýashylyǵy basqarmasy óńirdiń ákimderimen birlesip shaǵyn sharýashylyqtardyń jumystaryn uıymdastyrýlary kerek. Alda - sheshýshi apta, sondyqtan ýaqytty tıimdi paıdalaǵan jón», - dep atap aımaq basshysy Ermek Marjyqpaev.
Sonymen qatar, alda órt qaýipi kúsheıetin ýaqyt kele jatqandyqtan, oblys basshysy aýdandardyń ákimderi men tıisti salalyq qyzmet basshylaryna qatty qaldyq saqtaıtyn polıgondarda, atap aıtqanda Stepnogorsk, Makınsk, Esil qalalarynyń mańyndaǵy osyndaı oryndarda órt qaýipsizdiginiń saqtalýyn qatań baqylaýǵa alýdy tapsyrdy.
Keńeste oblys ákimi Ermek Marjyqpaev jartyjyldyqtyń qorytyndysy boıynsha keıbir salalar boıynsha kórsetkishterdi arttyrýǵa nazar aýdardy. Olardyń qatarynda bıýdjettik qarjyny ıgerý, ınvestıtsııa tartý, qurylys-montaj jumystarynyń kólemin arttyrý sııaqty salalar bar.
