Aqmola dıqandary bıyl 4,3 mln. astam gektar alqapqa egin ekpek
KÓKShETAÝ. QazAqparat -Aqmola oblysynda bıyl 4,3 mln. astam gektar alqapqa egin egiledi. Bul týraly búgin Aqmola oblysynyń ákimdiginde ótken kezekti ákimdik otyrysynda oblystyq aýyl sharýashylyǵy basqarmasynyń basshysy Murat Balpan málimdedi, dep habarlaıdy "QazAqparat" HAA tilshisi óńir basshysynyń baspasóz qyzmetine silteme jasap.
«Dándi jáne dándi-burshaqty daqyldar 4321,1 myń gektar aýmaqqa egiledi. Oblys boıynsha kóktemgi-egistik jumystaryn tıisti agrotehnıkalyq deńgeıde ýaqtyly əri sapaly ótkizý úshin barlyq sharalar qoldanylýda», dedi basqarma basshysy.
Baıandamashyny tyńdaǵan aımaq basshysy M.Myrzalın kóktemgi egis jumystarynyń qashanda qaýyrt kezeń ekendigin, al onyń sátti ótýi mol astyq alýǵa múmkindik beretinin atap ótti.
Sondaı-aq, otyrys barysynda oblystaǵy ınvestıtsııalyq jobalardyń oryndalý barysy týraly oblystyq kásipkerlik jáne ónerkásip basqarmasynyń basshysy Erbol Ospanov baıandady.
«Qazaqstan Respýblıkasy ındýstrııalyq-ınnovatsııalyq damytýdyń 2015-2019 jyldarǵa arnalǵan memlekettik baǵdarlamasy aıasynda Aqmola oblysynyń ındýstrııalandyrý kartasy men kásipkerlikti qoldaý kartasyna jalpy quny 828,3 mıllıard teńgeni quraıtyn jáne 13,7 myń turaqty jumys ornyn qurýǵa múmkindik beretin 111joba engizilgen» - dedi E.Ospanov.
Oblys ákimi óńirlerde ındýstrııalyq-ınnovatsııalyq damytýdyń Memlekettik baǵdarlamasynyń jańa talaptaryna saı, eksport baǵytyndaǵy joǵary tehnologııalyq óndiristerge kóp kóńil bólý qajettigin aıtty.
Odan ózge otyrysta kóktemgi áskerge shaqyrý naýqanynyń máseleleri de sóz boldy.
