Aqmola dıqandary kóktemgi egis jumystaryn tolyq aıaqtady
KÓKShETAÝ. KAZINFORM — Aqmola oblysynda kóktemgi egis naýqany sátti aıaqtaldy. Óńir elimizdiń soltústik oblystary arasynda alǵashqylardyń biri bolyp dala jumystaryn tolyq aıaqtap, jańa aýyl sharýashylyǵy maýsymyna senimdi qadam basty.
Bul nátıjege der kezinde júrgizilgen daıyndyq jumystary, memlekettik qoldaý sharalary jáne agrarshylardyń úılesimdi eńbegi arqasynda qol jetkizildi.
Aqmola oblysynyń Aýyl sharýashylyǵy jáne jer qatynastary basqarmasynyń málimetinshe, bıyl óńirdegi jalpy egis alqaby 77 myń gektarǵa ulǵaıyp, 5,6 mıllıon gektardy qurady. Sonymen qatar egis qurylymyn ártaraptandyrý baǵytyndaǵy jumystar jalǵasýda. Sońǵy úsh jylda maıly daqyldardyń kólemi alty esege ósip, 715 myń gektardan asty. Mal azyqtyq daqyldar 166,5 myń gektar jerge ornalastyrylsa, 10 myń gektardan astam alqapqa kartop pen kókónis egildi.
Óńirde egis naýqanyna daıyndyq jumystary aldyn ala júrgizilip, barlyq qajetti resýrstar ýaqytyly qamtamasyz etildi.
— Egis naýqanynyń tabysty ótýine materıaldyq-tehnıkalyq bazanyń júz paıyz daıyn bolýy yqpal etti. Aýyl sharýashylyǵy taýaryn óndirýshiler tuqym materıaldarymen jáne jeńildetilgen dızel otynymen tolyq qamtamasyz etildi. Topyraq qunarlylyǵyn arttyrý maqsatynda agrarshylar 330 myń tonna mıneraldy tyńaıtqysh engizdi. Sonymen qatar óńirdegi aýyl sharýashylyǵy qurylymdary ósimdikterdi qorǵaý quraldarymen tolyq qamtyldy, — dep atap ótti basqarma basshysy Nurbek Badyraqov.
Aýyl sharýashylyǵy salasyn qoldaý maqsatynda bıyl jeńildetilgen nesıeleý men sýbsıdııalaý aıasynda 235 mıllıard teńgeden astam qarjy bólindi. Onyń ishinde «Keń Dala — 2» baǵdarlamasy boıynsha kóktemgi egis jáne egin jınaý jumystaryn júrgizýge 840 aýyl sharýashylyǵy taýaryn óndirýshige 122 mıllıard teńge kóleminde qarjy qarastyryldy.
Sonymen qatar óńirde aýyl sharýashylyǵy tehnıkasyn jańartý jumystary qarqyndy júrgizilip jatyr. Jyl basynan beri sharýalar 789 jańa tehnıka satyp aldy. Al otandyq óndiristegi tehnıkany jeńildetilgen lızıngke berý baǵdarlamasy arqyly «QazAgroQarjy» AQ kómegimen 610 tehnıka satyp alý jóninde kelisimder jasaldy.
Agrarshylarǵa qosymsha qoldaý kórsetý maqsatynda «Azyq-túlik korporatsııasy» UK» AQ júzege asyratyn forvardtyq satyp alý baǵdarlamasy da tıimdi jumys istep jatyr. Bıyl jalpy quny 4,2 mıllıard teńge bolatyn kelisimsharttar 38 aýyl sharýashylyǵy taýaryn óndirýshimen jasaldy. Qazirgi tańda jalpy somasy 3,3 mıllıard teńge bolatyn 55 ótinim qarjylandyrylǵan. Bul 59 myń tonna aýyl sharýashylyǵy ónimin jetkizýge múmkindik beredi.
Mamandardyń aıtýynsha, egis naýqanynyń agrotehnıkalyq talaptarǵa saı jáne qolaıly merzimde aıaqtalýy bolashaq ónimniń sapasy men kólemine oń áser etedi. Sondaı-aq bul óńirdiń agroónerkásiptik keshenin damytýǵa jáne aýyl sharýashylyǵynyń básekege qabilettiligin arttyrýǵa berik negiz qalaıdy.
