Aqmola dárigerleri brakonerlerden japa shekken qoryqshynyń jaǵdaıy týraly aıtty
KÓKShETAÝ. QazAqparat – Brakonerlerdiń qolynan japa shekken «Ohotzooprom «ÓB» RMQK Ortalyq óńirlik fılıalynyń ınspektoryna Kókshetaýda ota jasaldy, dep habarlaıdy QazAqparat tilshisi Aqmola oblystyq densaýlyq saqtaý basqarmasynyń baspasóz qyzmetine silteme jasap.
Vedomstvonyń málimetinshe, keshki saǵat 20:30 shamasynda oq tıip, jaralanǵan ınspektor Jarqaıyń aýdanynan sanavıatsııamen Aqmola oblystyq kópbeıindi aýrhanasyna jetkizildi.
Aýrýhananyń bas dárigeriniń orynbasary Dmıtrıı Chaıkovtyń aıtýynsha, naýqas «Keýdesine tıgen oq jaraqatymen» jáne «Sol jaq ıyǵynyń jaralanýy» dıagnozdarymen tústi.
«Búgin naýqasqa ota jasalyp, denesinen bóten zat alyndy. Ota sátti ótti, der kezinde jetkizilip, jedel ota jasalǵandyqtan naýqastyń jaǵdaıy ortasha aýyr», dep aıtty Dmıtrıı Chaıkov.
Dárigerdiń sózinshe, naýqas jansaqtaý bóliminde jatyr. Esin jıǵan soń travmatologııa bólimshesiniń palatasyna aýystyrylyp, sonda odan ári em qabyldaıtyn bolady.
Aıta keteıik, osyǵan deıin habarlaǵanymyzdaı, 23 shildede shamamen saǵat 11.00-de «Ohotzooprom «ÓB» RMQK Ortalyq óńirlik fılıalynyń ınspektorlary Aqmola oblysy Jarqaıyń aýdanynda tabıǵatty qorǵaý zańnamasyn buzǵandardyń aldyn alý sharasyn júrgizgen jáne kıik atý faktisin anyqtaıdy. Zań buzýshylardyń izine túsken eki ınspektorǵa qarsy oq atylyp, sonyń saldarynan 1976 jylǵy ınspektor kóz jumdy, al, onyń 1975 jylǵy áriptesi jaralanyp, Jarqaıyń aýdandyq aýrhanaǵa jatqyzylǵan edi.
Qaıtys bolǵan qoryqshynyń artynda tórt balasy – úsh qyzy men bir uly qaldy.
QR Prezıdenti Qasym-Jomart Toqaev brakonerlerdiń qolynan qaza bolǵan «Ohotzooprom «ÓB» RMQK Ortalyq óńirlik fılıalynyń ınspektory Qanysh Nurtazınovtyń otbasyna kóńil aıtty.
Osy qylmysqa baılanysty arnaıy jedel-tergeý toby qurylyp, kúdiktilerdi ustaý boıynsha keshendi sharalar qolǵa alyndy. Kúdiktilerdi ustaýǵa Jarqaıyń, Esil jáne Jaqsy aýdandarynyń polıtsııa bóliminiń jeke quramy tartyldy. Patrýldik qyzmet narıadynan kúdiktilerdiń kóligine tuspaldaý berildi. Jarqaıyń jáne kórshi aýdandardyń aýmaǵynda 10 blok beket qoıylǵan bolatyn.
Artynsha, bul is QR Іshki ister mınıstri men Aqmola oblystyq PD basshysy óz baqylaýyna alyndy. Sonymen qatar, atalǵan oqıǵaǵa baılanysty QR QK 99 babynyń 1 bóligi boıynsha qylmystyq is qozǵalǵan bolatyn. Jedel izdestirý sharasy barysynda kúdiktiler Arqalyq qalasynyń 45 jastaǵy turǵyny men onyń 20 jastaǵy balasy ustaldy.
