«Aqmola Barysy» týrnıriniń jeńimpazdary anyqtaldy
KÓKShETAÝ. QazAqparat - Býrabaıda qazaq kúresinen «Aqmola Barysy» týrnıri ótip, eń myqty balýan anyqtaldy, dep habarlaıdy QazAqparat tilshisi.
"Aınakól" qonaqúı kesheni aýmaǵynda uıymdastyrylǵan saıysqa oblystyń ər óńirinen kelgen 28 sportshy altyn belbeýdi sarapqa saldy. Sharaǵa qatysqan aımaq basshysy Məlik Myrzalın jarystyń mańyzdylyǵyn aıta kele, balýandarǵa boz kilemde səttilik tiledi.
«Elbasy atap ótkendeı, salt-dástúr men mədenıet - bul ulttyń genetıkalyq kody. Qazaq kúresi sııaqty ulttyq sport túrimen oblysta 6 myńnan astam adamnyń aınalysatyny qýantady. Halqymyzdyń maqtanyshyna aınalǵan Qajymuqan Muńaıtpasov pen Balýan Sholaqtyń iz jalǵap júrgen qazaq kúresinen respýblıka chempıondary Nurlan Jamalov, Bekbol Nurlanuly, Leonıd Staneev sııaqty oblysta balýandar barshylyq", - dep atap ótti aımaq basshysy óz sózinde.
Jarys qorytyndysy boıynsha eń aýyr salmaqta beldesken túıe balýan kúresinde ereımentaýlyq Erbol Nurlanuly úshinshi (200 myń teńge júlde), aqkóldik Qaırat Mahtın ekinshi (400 myń teńge júlde) orynǵa laıyq dep tanylsa, bas júlde - avtokólik kókshetaýlyq balýan Mereke Turashevke buıyrdy.
Endi Mereke men Qaırat "Qazaqstan barysy" týrnırinde Aqmola oblysynyń namysyn qorǵaıtyn bolady.
