«Aqmola - Astana - Nur-Sultan»: Qala tarıhyn baıandaıtyn jańa joba tanystyryldy
Veb-saıt 1991 jyldan 2019 jylǵa deıingi barlyq eleýli oqıǵalar men muraǵattyq jáne beınematerıaldar negizinen quralǵan.
Jobany jasaýshy shyǵarmashylyq top músheleriniń aıtýynsha resýrs mátin jáne beınefılmmen qatar jańashyl mýltımedııalyq ámbebap formatta ázirlengen.
«Biz ózgerister dáýirinde ómir súrip jatyrmyz. Elimizde eleýli tarıhı oqıǵalar oryn alýda. Biz el damýyndaǵy jańa kezeńniń kýási bolyp otyrmyz. Komandamyz Qazaqstannyń barlyq basty oqıǵalaryn beıneleýge talpyndy. Bul veb-jobada - elimizdiń qalyptasý tarıhyn basty oqıǵalardyń tizbegi arqyly tanystyrýǵa tyrystyq. Tsıfrlyq álemde ómir súrip, aqparat alyp otyrǵan óskeleń urpaqqa elimizdiń tarıhy hronologııalyq retpen, qarapaıym ári jeńil sózdermen jetkiziledi», - dedi «Qazkontent» AQ-nyń basqarma tóraǵasy Dýman Qojahmetov OKQ-de ótken baspasóz qyzmetinde.
Onyń aıtýynsha, aldaǵy ýaqytta veb-derek jobasy tarıhymyzda oryn alatyn mańyzdy oqıǵalarmen tolyqtyrylyp otyratyn bolady. Ondaǵy negizgi erekshelik saıttyń júıeli jáne jańa formatta bolýy, sondaı-aq, qysqa ári nusqa bolýynda.
«Bizdiń maqsat - tarıhty túsinikti tilmen, artyq pafossyz nasıhattaý. Joba 2016 jyly qolǵa alynǵan bolatyn, onyń jasalýyna 10 adam qatysty. Veb-derekter saıtynda elorda tarıhyna qatysty buryn sońdy jarııalanbaǵan 100 foto júkteldi. Bul Astana jáne Almaty qalasynyń arhıvterimen birikken jumystyń nátıjesi», - dedi ol.
Veb-derekti joba qazaq jáne orys tilinde Astana-Nursultan.web-doc.kz siltemesinde qoljetimdi.
