Aqmola ákimi Zerendi aýdanynyń egistik alqaptaryn aralap kórdi
KÓKShETAÝ. QazAqparat – Aqmola oblysynyń ákimi Ermek Marjyqpaev Zerendi aýdanynda egistik alqaptardy aralap, «Nurly jer» baǵdarlamasynyń júzege asyrylýy barysymen tanysty, dep habarlaıdy QazAqparat tilshisi ákimdiktiń baspasóz qyzmetine silteme jasap.
Sapar barysynda aımaq basshysy Zerendi aýdanynyń Aqkól aýyldyq okrýginde bolyp, turǵyn úı qurylysy aýmaǵynda ınjenerlik kommýnıkatsııa júıesin tartý jumystaryna nazar aýdardy. Aqkól aýylynda «Nurly jer» baǵdarlamasy boıynsha jeke turǵyn úı salý úshin jalpy aýmaǵy 20 gektar bolatyn 170 jer telimi berilgen.
Búgingi kúni munda elektr jaryǵy tartylýda. Kelisimshart boıynsha bólingen 180 mıllıon teńgeniń, 120 mıllıony ıgerilgen. Keler jyly sý qubyry tartylady. Bul jumystar aıaqtalǵannan soń jer telimderi jeke turǵyn úı salý úshin baspana kezeginde turǵan adamdarǵa beriledi.
Aımaq basshysy Zerendi aýdanynyń ákimi Berikjan Ábýtálipovke qurylys alańyna ınjenerlik jelini tartý jumystaryn ýaqytyly qamtamasyz etýdi tapsyrdy.
«Jumys sapaly júrgizilýi kerek», - dedi Ermek Marjyqpaev.
Budant ári oblys ákiminiń sapary «Bereket-2050» sharýashylyǵynyń egistik alqaptaryna jalǵasty. Sharýashylyq 5 myń gektar alqapta bıdaı, arpa, raps, zyǵyr tárizdi daqyldardy ekken. Buryndary tastandy bolǵan alqapta búgingi kúni jaıqalyp egin ósip tur. Sharýashylyq qatarynan eki jyl egin sharýashylyǵymen aınalysady.
«Arpany jyǵý jumystaryn aıaqtadyq. Shyǵymdylyǵy jaman emes, ár gektarynnan 25-28 tsentnerden ónim alynatynyn boljap otyrmyz. Al bıdaıdan 25-28 jáne 30 gektarǵa deıin ónim alynatyny kútilýde. Topyraqty óńdeýde No-till tehnologııasyn qoldanamyz», – deıdi seriktestik dırektory ıAkov Savchenko.
Sharýashylyq jumysyna kóńili tolǵan aımaq basshysy qońyr kúzde mol ónim alýlaryna tilektestigin bildirdi.
Sonymen qatar, oblys ákimi Ýálı han mazarynda boldy. Tarıhı nysannyń aýmaǵyn jergilikti metsenat, «Bereket - 2050» JShS basshysy Borıs Kozlov 10 mıllıon teńge qarjy bólip, abattandyrǵan. Osy rette, aımaq basshysy kıeli orynǵa jol qurylysyn júrgizý máselesin talqylady.
