Aqmola ákimi turǵyndardyń shaǵymy boıynsha birqatar qurylys nysandaryn aralady

KÓKShETAÝ. QazAqparat - Aqmola oblysynyń ákimi Málik Myrzalın jaqynda jergilikti «Kókshe» telearnasynda tikeleı efırde ótken «Ákim saǵaty» baǵdarlamasynda qonaq bolǵan edi. Ákim efır kezinde turǵyndar joldaǵan shaǵymdar boıynsha Kókshetaý qalasyndaǵy birqatar qurylys nysandaryn aralady, dep habarlaıdy QazAqparat tilshisi ákimdiktiń baspasóz qyzmetine silteme jasap.

Stýdııaǵa joldanǵan saýaldardyń arasynda «Saryarqa» shaǵynaýdany 11/3 mekenjaıynda ornalasqan toǵyz qabatty turǵyn úıde lıft jumys istemeıtini sóz bolǵan edi. Qala ákimi Ermek Marjyqpaevtyń aıtýynsha, turǵyn úı qurylysy 2014 jyly bastalyp, 2016 jyly aıaqtalypty. Joba boıynsha turǵyn úıge túrkııalyq lıft ornatylyp, keıin onyń mehanızmi jumys istemeı qalǵan. Qazirgi kezde qala ákimdigi demeýshiler esebinen qajetti 1,5 mıllıon teńge kóleminde qarajat tapqan. Málik Myrzalın qala basshylyǵyna lıftini 15 jeltoqsanǵa deıin iske qosýdy tapsyrdy.

«Turǵyndarǵa naqty bir merzim kerek. Jeltoqsannyń 15-ine deıin aıaqtalýy tıis. Ózim kelip, tekseremin», - dedi aımaq basshysy.

Al, «Otaý Sıtı» TQK qurylys alańynda turǵyn úı qurylys kooperatıviniń músheleri 2 jyl boıy kózdegen úılerine qol jetkize almaı keledi. PD aktsıonerge qatysty tergeý amaldaryn júrgizýde.  

Kezdesýde merdigerler qurylys jumystaryn qarashanyń 1-nen bastap jandandyratynyn aıtty. Qarjylandyrýda irkilis bolmasa, nysandy 2019 jyldyń birinshi jarty jyldyǵynda paıdalanýǵa berý josparlanǵan. Málik Myrzalın kooperatıv múshelerine týyndaǵan suraqtardy túsindirý qajettigin aıta kele, qala ákimine qurylys jumystarynyń barysy týraly aıyna bir ret aqparat berip otyrýdy tapsyrdy.

Sonymen qatar, ákim Krasnoıar baǵytyndaǵy joldyń boıynda salynyp jatqan oqý-tárbıe kesheniniń qurylys alańynda boldy. Sol aýmaqtaǵy turǵyndar qurylys jumystarynyń toqtap qalǵanyna alańdaǵan edi. Geologııalyq barlaý jumystarynyń sáıkes kelmeýine baılanysty joba túzetýge jiberilipti. Qazir kezde jumys jobasy jasalyp, qurylys jandana bastady.

Aımaq basshysy qala basshylyǵy men merdiger uıymǵa nysandy 2019 jyldyń 1 qyrkúıeginde belgilengen merzim ishinde paıdalanýǵa berýdi tapsyrdy. 

Sonymen birge, Málik Myrzalın atalmysh joldyń boıynda ár júz metr saıyn qoqystardyń úıilip, shashylyp jatqanyn kórip, qala basshylyǵyna syn aıtty. Tez arada qoqystardy tazartyp, qala tazalyǵyn qamtamasyz etýdi tapsyrdy.

Sondaı-aq, aımaq basshysy Esenberlın kóshesiniń boıynda ótken jyly paıdalanýǵa berilgen sport alańyn baryp kórdi. Bul sport alańy da merdigerlerdiń sapasyz jumysynyń saldarynan bir jyl ótpeı jatyp, paıdalanýǵa jaramsyz bolyp qalǵan. ıAǵnı, jasandy jamylǵylary qoparylyp, jyrtylǵan. Merdiger uıym ótken jyly oblys ortalyǵynda barlyǵy 13 sporttyq jáne 8 balalar alańyn salypty. Aımaq basshysy bul alańdardy da baqylaýǵa alýdy tapsyrdy. Óz kezeginde qala ákimi Ermek Marjyqpaev kemshilikter merdigerler tarapynan kepildendirý mindettemeleri sheńberinde joıylatynyn atap ótti.