Aqmola ákimi soǵys ardageriniń kitabyn jaryqqa shyǵarýǵa kómektesýdi tapsyrdy

KÓKShETAÝ. QazAqparat - Aqmola oblysynyń ákimi Ermek Marjyqpaev jumys saparymen Arshaly aýdanynda bolyp, birqatar óndiris oryndaryn, áleýmettik nysandardy aralap kórdi jáne atqarylyp jatqan jumys jaıymen tanysty, dep habarlaıdy QazAqparat tilshisi ákimdiktiń baspasóz qyzmetine silteme jasap.

Aımaq basshysy saparyn Mıhaılovka selosynda turatyn soǵys ardageri Georgıı Belıaevtiń úıine kirýden bastady.

Georgıı Semenovıch 2-shi áýe kúshteri armııasynda Voronej baǵytyndaǵy soǵysqa qatysqan. Sodan keıin mılıtarıstik Japonııaǵa qarsy urys qımyldaryna da bastan-aıaq qatysyp, soǵys surapyldaryn óz kózimen kórip, kýási boldy. Týǵan jerge oralǵannan keıin ol 30 jyldaı mektep dırektory bolyp, jas urpaqty tárbıeleýge atsalysypty. Búginde zeınet demalysyndaǵy maıdanger bastan keshkenderi týraly kitap jazǵan eken. Oblys basshysy aýyl ákimine ardagerdiń kitabyn jaryqqa shyǵarýǵa kómektesýdi tapsyrdy.

Arshaly kentinde óńir basshysy aýdandyq aýrýhanada bolyp, medıtsına qyzmetkerlerimen júzdesti.

«Sizderde akýsher jetispeıtindigin bilemin. Syrttan mamandy tartý úshin eń aldymen baspana máselesin sheshý qajet. Bul máseleni sheshýdiń múmkindikterin qarastyrý qajet», - dep aýdan ákimine osy máseleni sheshý kerektigin eskertti.

Sondaı-aq, oblys basshysy smetalyq-jobalyq qujattary jasalǵan aýrýhana ǵımaratynyń kire berisin jóndeýge kirisý qajettigin eskertti.

Oblys ákimi bloktyq-modýldi qazandyqtyń qurylysymen tanysty. Qazandyq qurylysyna 133 mıllıon teńge qarjy bólingen. Ol 30 myń sharshy mert alańdy jylytady. Qazandyqqa áleýmettik nysandarmen birge, biraz kóp páterli úıler qosylmaq. Jańa qazandyq iske qosylǵanda eski jeke 4 qazandyqtyń jumysy toqtatylyp, ekologııalyq jaǵynan da jaǵymdy yqpaly bolmaq.

Jibek joly aýylynda óńir basshysy Imanjúsip Qutpanuly atyndaǵy mektepke júrgizilip jatqan jóndeý jumystaryn kórdi. Oǵan 158,2 mıllıon teńge qarjy bólinipti. Jóndeý jumystary 15 tamyzǵa deıin aıaqtalady dep josparlanǵan. Osy eldi mekendegi qoqys qaldyqtaryn óńdenıtin keshen qurylysymen tanysqan oblys basshysyna tereńdetile óńdeıtin sheteldik tehnologııamen jumys isteıtin kásiporyn týraly jan-jaqty aqparat berildi. Sondaı-aq, seloda demalys aımaǵy salynbaqshy.

Ermek Marjyqpaev dárigerlik ambýlatorııanyń qyzmeti men avtokólik jolyna júrgizilip jatqan jóndeý jumystarynyń barysyn qarap kórdi. 35 shaqyrymdyq avtokólik jolyn jóndeýge bıýdjetten 2 mıllıard 535 mıllıon teńge qarjy bólingen. «Sizderdiń eń basty mindletterińiz - jumysty belgilengen kestege saı júrgizip, sapaǵa jete nazar aýdarý» dedi oblys basshysy.

Jumys saparynyń sońynda óńir basshysy Esil ózeniniń sý tasýyna baılanysty qaýip tóndiretin aýmaǵynda bolyp, jaqyn mańdaǵy úılerdi sý basýdan saqtaý sharalaryna nazar aýdardy jáne «Ijevskıı» óndiristik kooperatıviniń jumysshylarymen kezdesti.