Aqmola ákimi Sandyqtaýdaǵy nysandardyń jaǵdaıymen tanysty
KÓKShETAÝ. QazAqparat - Aqmola oblysynyń ákimi Ermek Marjyqpaev jumys saparymen Sandyqtaý aýdany jáne Stepnogorsk qalasynda boldy, dep habarlaıdy QazAqparat tilshisi ákimdiktiń baspasóz qyzmetine silteme jasap.
Sapar barysynda aımaq basshysy jattyqtyrýshylar ujymymen, jas sportshylarmen áńgimelesip, olarǵa oqý men úlken jarystarda tabysty bolýlaryna tilektestik bildirdi.
Sondaı-aq, oblys ákimi Shańtóbedegi balalar baqshasynyń, mekteptiń, arnaıy áleýmettik kómek kórsetý ortalyǵynyń, Balkashın aýylyndaǵy mektepter men aýdandyq aýrýhananyń tynys-tirshiligimen tanysty. Munda kadr máselesiniń ózektiligne nazar aýdaryldy.
Áleýmettik kómek kórsetý ortalyǵynda 2018 jyly 560 mıllıon teńgeniń kúrdeli jóndeý jumystary júrgizilgen. Turǵyndar áleýmettik turǵydaǵy qolaılyqtardyń aýqymy keńeıgenine alǵystaryn bildirdi. Ortalyqty em-sharalarmen qatar eńbek terapııasyna da kóńil bólinedi.
Aımaq basshysy «Shańtóbe-energokompleks» JShS-ne qarasty jańa qazandyqtyń jumysymen tanysty. Bul nysanǵa «Nurly jer» baǵdarlamasy aıasynda 1,2 mıllıard teńge ınvestıtsııa baǵytalǵan. Kásiporyn dırektory Rýslan Ptýhov qazandyqtyń byltyrǵy qysqy maýsymda kidirissiz jumys istegenin jáne shyǵynnyń 38-40 paıyzǵa tómendegenin baıandady. Sonymen birge, oblys basshysy 56 shaqyrymdyq «Shańtóbe-Balkashın» jolynyń jóndeý jumystaryna den qoıdy. Byltyr joldyń 11 kılometri jóndelse, bıyl taǵy da 20 kılometri jańartyldy.
Oblys ákimi Balkashın aýylyndaǵy «Halal» tsehynyń jumysyna oń baǵasyn berdi. Atalǵan shaǵyn kásiporyn «Jumyspen qamtýdyń jol kartasy-2020» memlekettik baǵdarlamasynyń sharapatyn kórip otyr. Mundaǵy manty, túshpara, chebýrek, sheshen toqashtary tutynýshylar suranysyndaǵy ónimderdiń bir parasy ǵana. Bul oraıda, tseh basshysy Seda Ýmarovanyń óndiristi saýyn sıyr fermasyn ashý arqyly damytý jospary kóńilden shyǵady.
Ermek Marjyqpaev Sandyqtaý aýdanynyń ákimi Asqarbek Úısimbaevqa jappaı kásipkerlik qozǵalysyn óristetý, bul úshin «qarapaıym ister ekonomıkasy» jobasy boıynsha nesıelendirý tetikterin keńinen túsindirý qajettigi týraly tapsyrma berdi.
Óńir basshysy Maksımovka aýylynda aýyl sharýashylyǵy óndirisiniń bilgir uıymdastyrýshysy, tanymal metsenat, «Svobodnoe» JShS dırektory Aleksandr Zakýsılovpen kezdesti. Sharýashylyq óz qarjysyna qoǵamdyq monsha jáne barlyq qolaılylyqtar qarastyrylǵan 10 turǵyn úı «qalashyǵyn» paıdalanýǵa bergen.
«Biz asa qajetti áleýmettik nysandardy kásiporyn paıdasy esebinen turǵyzdyq. Bul aqshany turǵyndar óz eńbegimen tapqan. Sondyqtan, zamanaýı ıgiliktedi de solarkórýi kerek» deıdi seriktestik basshysy.
Osy rette, baspana qýanyshyna bólengender qatarynda kásiporyn qyzmetkerlimen qatar, kópbalaly analar, mektep muǵalimderi barlyǵyn aıtqymyz keledi.
Ermek Marjyqpaev Aleksandr Zakýsılovqa rızalyǵyn «Úlken árippen jazylatyn metsenat» degen qurmet baǵamymen bildirdi jáne adamdardyń aýyldyq jerde turaqtap qalýy jolyndaǵy ıgi istiń ózgelerge úlgi bolýy qajettigin aıtty.
Óz ákesiniń ónegeli isin kishi Aleksandr Zakýsılov ta jalǵastyryp keledi. Ol 15 jyldan astam ýaqyttan beri «Maksımovskoe» JShS basqarýda. Byltyrǵy jyldyń sońynda seriktestik jetekshisi týǵan aýylyna álemdik hokkeı lıgasy talaptaryna saı keletin jabyq hokkeı kortyn syıǵa tartty. Biraq, búgingi kúnge deıin munda arnaıy jattyqtyrýshy bolmaǵan eken. Oblys ákimi bul máseleni qysqa merzimde sheshýge, hokkeı jattyqtyrýshysy shtatyn bólý qarastyrylatynyn atap ótti.
